Зүүнбаян-Ханги чиглэлийн төмөр замын доод бүтцийн ажил 98 хувь, дэд бүтцийн ажил 70 гаруй хувьтай үргэлжилж байгаа талаар Зам, тээврийн хөгжлийн яамнаас мэдээллээ.
Тодруулбал, арваннэгдүгээр сарын 4-ний байдлаар:
Барилгын ажлын доод бүтцийн ажлын гүйцэтгэл:
- Газар шорооны ажил 100%,
- Гүүрийн ажил 98%,
- Ус өнгөрүүлэх хоолойн ажил 100%,
Дэд бүтцийн ажлын гүйцэтгэл:
- Дээд бүтцийн угсралтын ажил 79.4%,
- Өртөө зөрлөгийн барилга 95%,
- Замыг төслийн түвшинд өргөж чигжих 42.8%,
- Эрчим хүчний ажил 61 хувьтай байна.
Дээрх барилгын болон дэд бүтцийн ажил дууссаны дараа техникийн комисс ажлыг хүлээн авах ёстой. Техникийн комисс нь бүрэн дууссан барилга байгууламж, өртөө, зөрлөг хоорондын зам, сум, дохиоллын байгууламжийг хэсэгчлэн хүлээж авах боломжтой бөгөөд тус комисс нь төслийг бүрэн хүлээж авсны дараа зүгшрүүлэх тээврийг эхлүүлэх аж. Харин зүгшрүүлэх тээврийг 75 мянган тонн хүртэл хийж болох бөгөөд түүний дараа улсын комисс хүлээх авах процесс явагдана. Улсын комисс хүлээн авснаар суурь бүтэц эзэмшигчийг тодорхойлж, тээвэрлэлтийн үйл ажиллагааг эхлүүлэх юм.
Зүүнбаян-Ханги чиглэлийн шинэ төмөр зам нь Дорноговь аймгийн Мандах, Зүүнбаян, Хөвсгөл, Хатанбулаг сумдын газар нутгаар дамжин Монгол-Хятадын хилийн Ханги-Мандал боомтын улсын хил нэвтрэх цэг хүртэл 226.9 километр урттай, 2 өртөө 6 зөрлөгтэйгөөр төлөвлөгдсөн. Хамгийн бага радиус нь 1,200 метр төдийгүй хоногт 9 хос галт тэрэг буюу жилд 20 сая тонн ачаа тээвэрлэх хүчин чадалтай байх юм.
Одоогоор төслийн газар шорооны ажилд 31, төмөр бетон хоолойн ажилд 37, барилгын ажилд 3, эрчим хүчний ажилд 1 буюу нийт 72 аж ахуйн нэгж ажиллаж байгаа аж.