Сөүл хотын Юнсан дүүргийн Итэвон хороонд аравдугаар сарын 29-нөөс 30-нд шилжих шөнө хэт олон хүн цугларснаас үүдэлтэй ослоос шалтгаалан олон хүний эрдэнэт амь эрсэдсэн эмгэнэлт явдал болсон билээ. Суугаа орны төр засаг, ард иргэд, дэлхийн улс орнууд болсон хэрэг явдалд эмгэнэн гашуудаж, сэтгэл зүрхээрээ хамт байгаагаа илэрхийлж байна.
Энэхүү хүнд цаг үед бид солонгос анд нөхөдтэйгөө хамт бөгөөд манай улсын иргэд та бүхэн оршин суугаа орныхоо гашуудалт цаг үеийг хүндэтгэн, аливаа төрлийн баяр ёслол, тоглолт, спорт наадам зохион байгуулахгүй, оролцохгүй байхыг уриалж байна. Сөүлд амиа алдагсдын тоо тоо бямба гарагийн байдлаар 150-д хүрчээ. Одоогоор Хятадын 3, АНУ-ын 2, Японы 2, ОХУ-ын 2 иргэн амиа алдсан нь тогтоогджээ. Мөн Иран, Тайланд, Шри-Ланка, Австрали, Норвеги, Франц улсууд иргэд нь хохирогч болсныг баталсан байна.
Эх сурвалж: Монгол Улсаас БНСУ-д суугаа Элчин сайдын яам