Их Британийн Collins англи хэлний толь бичиг 2026 оны онцлох үгээр Z болон Альфа үеийнхний дунд эрчимтэй тархсан “Mogging” хэмээх хэллэгийг тодрууллаа. “Mogging” гэдэг нь гадаад төрх, хувцаслалт, биеэ авч явах байдал болон амжилтаараа бусдаас илүү гарч, тэднийг “сүүдэртүүлэх” буюу давамгайлах гэсэн утгатай интернэт нэр томьёо юм. Жишээлбэл, хэн нэгэн олны дундаас хэт загварлаг хувцаслалтаараа ялгарах тохиолдлыг цахим орчинд “Everyone is getting mogged” хэмээн тодорхойлдог байна.
Энэхүү үг нь анх 2016 онд бодибилдингийн цахим бүлгэмүүдэд “Alpha Male of the Group” гэсэн утгаар хэрэглэгдэж эхэлсэн түүхтэй. Харин сүүлийн жилүүдэд TikTok зэрэг олон нийтийн сүлжээгээр дамжин залуусын өдөр тутмын хэллэг болон өргөжжээ. Collins толь бичгийн судалгаагаар “Mogging” гэх үгийн хэрэглээ зөвхөн 2026 онд гэхэд 210 хувиар өссөн байна.
Тус байгууллага нь жил бүр цахим орчин болон хэвлэл мэдээллийн 27 тэрбум гаруй үг бүхий өгөгдлийн санд дүн шинжилгээ хийж, нийгмийн хандлагыг хамгийн тод илэрхийлсэн үгийг шалгаруулдаг уламжлалтай. Энэ жилийн онцлох үгсийн жагсаалтад “Mogging”-оос гадна дараах нэр томьёо багтсан байна:
- “Ghost jobs” — Бодитоор ажилтан авах зорилгогүй, зөвхөн компанийн нэр хүндийг өсгөх зэрэгт ашигладаг хийсвэр ажлын зар.
- “P(doom)” — Хиймэл оюун ухааны хөгжил хүн төрөлхтний оршин тогтнолд аюул учруулах магадлалыг тооцсон математик-статистикийн илэрхийлэл.
