PISA 2025 олон улсын үнэлгээний үр дүн гарлаа. Энэ удаагийн үнэлгээнд дэлхийн 91 улсын 760 мянга гаруй сурагч оролцсоноос Монгол Улсын 191 сургуулийн 7,146 сурагч хамрагдсан байна. PISA нь сурагчид сургуульд олж авсан мэдлэг, чадвараа бодит амьдралд хэрхэн ашиглаж байгааг үнэлдэг олон улсын судалгаа юм.
Монголын сурагчид энэ удаа математикаар 419, байгалийн ухаанаар 424, унших чадвараар 374 оноо авчээ. Харин 2022 оны үр дүнтэй харьцуулахад байгалийн ухааны гүйцэтгэл 12 оноогоор ахисан байна.
Гэхдээ анхаарах нэг үзүүлэлт бий. Монголын сурагчдын 56.9 хувь нь байгалийн ухаанаар суурь болон түүнээс дээш түвшний гүйцэтгэл үзүүлжээ. Энгийнээр хэлбэл, 100 сурагч тутмын 57 нь шаардлагатай суурь түвшинд хүрсэн бол 43 нь хүрээгүй гэсэн үг.
Мөн сурагчдын амжилтад зөвхөн хичээл сурлага бус, гэр бүл болон сургуулийн орчин нөлөөлж байгааг үр дүн харуулжээ. Тухайлбал, сурагчдын сониуч зангийн үзүүлэлт нэг нэгжээр нэмэгдэхэд байгалийн ухааны гүйцэтгэл 11 оноогоор өндөр байв. Хүүхдийнхээ бие даан суралцахыг дэмждэг, хичээл сурлага болон сайн сайхан байдалд нь анхаарч, тогтмол ярилцдаг эцэг эхтэй сурагчдын гүйцэтгэл ч илүү гарчээ.
Нөгөө талд Монголын ерөнхий боловсролын сургуулиудын цахим сургалтын бэлэн байдал ЭЗХАХБ-ын дунджаас доогуур хэвээр байна. Үүнд сургуулийн интернэтийн сүлжээ, программ хангамж, техникийн асуудал болон сургалтад цахим хэрэгсэл ашиглах зохицуулалт нөлөөлж байгааг тайланд дурджээ.
PISA 2025-ын үр дүнгээс харахад Монголын сурагчдын байгалийн ухааны гүйцэтгэлд ахиц гарсан ч сурагч бүр суурь мэдлэг, чадвар эзэмших боломжийг бүрдүүлэх, сургалтын орчны ялгааг багасгах шаардлага хэвээр байна.
