Монголын ноолууран бүтээгдэхүүн үйлдвэрлэгч GOYOL Cashmere компанийн урласан Милан–Кортина 2026 өвлийн олимпын Монголын шигшээ багийн ёслолын хувцас дэлхийн хамгийн нэр хүндтэй бүтээлч наадам болох Cannes Lions International Festival of Creativity-ийн Shortlist буюу шилдэг бүтээлийн жагсаалтад шалгарлаа. Энэ нь Монголын бүтээл анх удаа тус наадмын эцсийн шатны шалгаруулалтад багтаж буй тохиолдол болж байна.
Гэхдээ олон нийтийн сүлжээнд түгээд буй “Cannes Lions-ын шилдгээр шалгарсан” гэх мэдээлэл нь ташаа юм. Одоогоор энэхүү бүтээл нь Lion шагнал хүртээгүй, харин олон мянган бүтээлээс сонгогдсон Shortlist-д багтсан нь албан ёсоор баталгаажжээ.
Энэхүү олимпын хувцас нь XIII–XV зууны Их Монгол Улсын үеийн хувцасны хийцээс санаа авч, үндэсний дээлний уламжлалт хэлбэрийг орчин үеийн шийдэлтэй хослуулснаараа онцлог. Загварт хөдөлгөөнд саад болохгүй задгай хормой, салхи, хүйтнээс хамгаалах өндөр зах, дулаан, эв нэгдлийг бэлгэдсэн давхар энгэр зэрэг уламжлалт элементүүдийг хадгалсан бөгөөд Монголын ноолуур, сарлагийн хөөврийг ашиглан бүтээжээ. Мөн хөх өнгө нь монголчуудын “Мөнх хөх тэнгэр”-ийг бэлгэддэг.
GOYOL Cashmere-ийн мэдээлснээр энэхүү цуглуулгын зорилго нь зөвхөн уламжлалт хувцсыг орчин үеийн загвартай хослуулах бус, Монголын олон зууны түүх, соёлын өвийг дэлхийн тавцанд дахин таниулах явдал байжээ.
Монголын олимпын багийн хувцас олон улсын хэвлэлүүдийн анхаарлыг мөн татсан байна. NBC, Olympics.com зэрэг хэвлэлүүд энэхүү загварыг өвлийн олимпын хамгийн өвөрмөц, дэгжин хувцаснуудын нэгээр нэрлэж, Монголын уламжлал, орчин үеийн дизайны амжилттай хослол болсон хэмээн онцолжээ.
Cannes Lions International Festival of Creativity нь 1954 оноос хойш зохион байгуулагдаж буй дэлхийн хамгийн нэр хүндтэй бүтээлч сурталчилгаа, дизайн, маркетингийн наадам бөгөөд жил бүр дэлхийн шилдэг агентлаг, брэндүүд өрсөлддөг. Иймээс Shortlist-д шалгарна гэдэг нь өөрөө олон улсын хэмжээнд өндөр үнэлгээ авсны илэрхийлэл гэж бүтээлч салбарынхан үздэг.
