Стриминг үйлчилгээний тэргүүлэгч Netflix компани хэрэглэгчдэд шинэ кино, цуврал олоход хялбар болгох зорилгоор TikTok болон Instagram Reels-тэй төстэй босоо форматтай богино видеоны “Clips” цэсийг нэвтрүүлэхээ зарлалаа.
Шинэ боломж нь Netflix-ийн гар утасны аппликэйшнд байрлах бөгөөд кино, цуврал, баримтат бүтээлүүдийн онцлох хэсгүүдийг богино хэмжээний босоо видеогоор харуулах юм. Хэрэглэгчид эдгээр клипийг TikTok шиг дээш доош гүйлгэн үзэхээс гадна сонирхсон бүтээлээ шууд үзэх, үзэх жагсаалтдаа нэмэх, бусадтай хуваалцах боломжтой байна.
Netflix-ийн мэдээлснээр үзэгчид ямар контент үзэхээ сонгоход улам их хугацаа зарцуулж байгаа тул энэхүү шинэчлэл нь тухайн бүтээлийн уур амьсгал, үйл явдлыг товч хугацаанд мэдрэх боломж олгох аж. Ингэснээр хэрэглэгчид өөрт тохирох кино, цувралаа илүү хурдан сонгоно гэж тус компани үзэж байна.
Сүүлийн жилүүдэд богино хэмжээний босоо видео контент цахим орчинд давамгайлах болсон бөгөөд TikTok, Instagram Reels, YouTube Shorts зэрэг платформуудын амжилт хэрэглэгчдийн контент хэрэглээний хэв маягийг өөрчилсөн. Netflix-ийн шинэ “Clips” цэс нь энэ чиг хандлагыг стриминг үйлчилгээтэй хослуулсан алхам гэж шинжээчид дүгнэж байна.
Гэхдээ Netflix “Clips”-ийг бие даасан сошиал сүлжээ биш, харин платформ дээрх контентуудыг илүү үр дүнтэй танилцуулах хэрэгсэл гэж тодорхойлжээ.
Тус шинэчлэл эхний ээлжид АНУ, Канад, Их Британи, Австрали зэрэг зах зээлд нэвтрэх бөгөөд цаашид бусад улс оронд шат дараатайгаар хүргэхээр төлөвлөж байна.
Эх сурвалж: Netflix, TechCrunch.
