Пуэрто Рикогийн дуучин, реппер, жүжигчин Bad Bunny Disney-ийн “Toy Story 5” кинонд мартагдсан тоглоомын дүрд дуу оруулахаар болжээ.
Disney-ийн мэдээлснээр тэрбээр “Pizza With Sunglasses” нэртэй, “cool бөгөөд нууцлаг” дүрд дуу оруулах аж. Уг дүр нь хаягдсан агуулахад амьдардаг мартагдсан тоглоомуудын жижиг бүлгийн гишүүн юм байна. Мөн кинонд шинээр Шотландын жүжигчин Alan Cumming нэгдэхээр болсон бөгөөд тэрээр Вүүдигийн морь Bullseye-ийн “муу талын” хувилбарт дуу оруулах ажээ.
“Toy Story 5” кино ирэх зургаадугаар сарын 19-нд нээлтээ хийх бөгөөд сүүлийн trailer мягмар гарагт цацагджээ. Анх 1995 онд эхэлсэн Toy Story цуврал нь хүмүүс байхгүй үед тоглоомууд амь ордог ертөнцийг харуулдгаараа алдартай. Энэ удаагийн ангид Buzz Lightyear болон халцарч эхэлсэн Woody нар эзэн Bonnie-гээ “Lilypad” нэртэй ухаалаг төхөөрөмжөөс хамгаалахын тулд дахин нэгдэж байгаа талаар өгүүлэх аж.
