БНСУ-ын болзооны шинэ шоу “Dating Boarding School” олон нийтийн анхаарлыг татаж байна. Тус шоу нь өмнө нь гэрлэж байсан, дахин хайртай учрахыг хүссэн эмэгтэйчүүдийг хэзээ ч болзож үзээгүй эрчүүдтэй уулзуулдгаараа онцлог ажээ. Шоу дөрөвдүгээр сарын 14-нд MBC Every1 сувгаар нээлтээ хийсэн бөгөөд The Korea Times-ийн мэдээлснээр, оролцогчдын болхи, ичимхий харилцаа, мэдрэмжээ илэрхийлэхдээ будилж буй байдал нь шоуны гол өнгө аяс болжээ. Тэд зөвхөн яриагаараа бус нүүрний хувирал, биеийн хөдөлгөөнөөрөө ч эвгүй, туршлагагүй байдлаа илэрхийлдэг байна.
Мөн оролцогчид таалагдсан хүнтэйгээ хэрхэн харилцахаа мэдэхгүй будилж, нэг энгийн хариултыг хүртэл олон цагаар бодож, утгыг нь тайлахыг оролддог нь үзэгчдийн сонирхлыг татаж байгаа аж.
Сүүлийн үеийн dating reality шоуны ихэнх нь төгс романтик харилцаа, чадварлаг сээтэгнэл, сэтгэлзүйн тоглолтод төвлөрдөг бол Dating Boarding School эсрэгээрээ туршлагагүй, бодит харилцааг харуулж буйгаараа ялгарч байгаа аж.
