Хятадад 10 айл тутмын 9 нь өөрийн гэсэн орон сууцтай гэх тооцоо бий. Сүүлийн 30 жилийн турш орон сууц өмчлөх нь тус улсын эдийн засгийн өсөлтийн гол хөдөлгөгч хүчний нэг болж, сая сая хүний “өөрийн гэртэй болох” мөрөөдлийг биелүүлжээ.
1990-ээд онд төрийн халамжийн орон сууцны систем аажмаар зогссоноор хувийн өмчийг хүчтэй дэмжих бодлого хэрэгжиж эхэлсэн байна. Ингэснээр барууны орнуудтай харьцуулахад орон сууц өмчлөл Хятадад өндөр хувьтай болжээ.
АНУ-д олон залуус сургалтын зээлд дарагдан 30 нас хүртлээ түрээсийн байранд амьдардаг бол Хятадад их сургуулиа төгсмөгцөө л анхны байрныхаа төлөвлөгөөг гаргаж эхэлдэг аж.
Гэвч эдийн засгийн өсөлт саарч, үл хөдлөх хөрөнгийн салбар хямралд орсноор “орон сууцтай болох мөрөөдөл” сорилттой тулгарч эхэлжээ.
Албан ёсны статистикаар 2024 онд шинэ орон сууцны борлуулалт 7.3 их наяд юаньд хүрч, 2021 оны оргил үеийн 16.2 их наяд юаниас хоёр дахин буурсан байна. Шинэ байрны борлуулалтын хэмжээ өнгөрсөн онд дахин 8.7 хувиар буурсан талаар эдийн засагчид онцолжээ. Үүний улмаас олон хүн ипотекийн зээл авахаас болгоомжилж эхэлсэн байна.
Бээжинд амьдардаг 36 настай график дизайнер Цай Ёүчэн байр худалдаж авах төлөвлөгөөгөө түр хойшлуулжээ. Тэрээр түрээсийн амьдрал тогтворгүй мэт санагддаг ч эдийн засгийн хувьд тооцоолоод үзэхэд түрээс нь одоохондоо илүү ашигтай гэж үзэж буйгаа хэлсэн байна.
1.4 тэрбум хүн амтай Хятадад ийм мэдрэмж маш түгээмэл байдаг. Учир нь тус улсад орон сууц өмчлөх нь зүгээр нэг үл хөдлөх хөрөнгийн гэрчилгээний асуудал биш аж.
Хятадын соёлд өөрийн байртай байх нь зөвхөн санхүүгийн тогтвортой байдал, нийгмийн байр суурийг илэрхийлээд зогсохгүй “гэр бүлдээ анхаарал тавьж буй хүний илэрхийлэл” гэж үздэг талаар Хонконгийн их сургуулийн социологийн профессор Эрик Фонг тайлбарлажээ.
Түүний хэлснээр, Күнзийн уламжлалт үзэлд гэр бүл хамгийн чухал байр суурь эзэлдэг бөгөөд “бүх зүйл гэр бүлээс эхэлдэг” гэсэн ойлголт Хятадын нийгэмд гүн суусан хэвээр байгаа аж.
ЭХ СУРВАЛЖ: CNN
