АНУ-ын Охайо мужийн нэгэн дунд сургуульд засвар хийж байх үеэр шүүгээний ард хавчуулагдсан улаан өнгийн цүнх олджээ. Энгийн нэг мартагдсан эд зүйл мэт харагдсан ч уг цүнх 1957 оноос хойш тэнд байсан нь тогтоогдсон байна.
Цүнх дотор тухайн үеийн хар, цагаан зургууд, сам, гоо сайхны хэрэгсэл, 26 цент мөнгө, хөлбөмбөгийн хуваарь, бүр комикс зурсан тэмдэглэл хүртэл байжээ. Энэ бүхэн тухайн үеийн өсвөр насны охины өдөр тутмын амьдралыг яг хэвээр нь хадгалсан мэт санагдуулж байв.
Удалгүй цүнхний эзэн нь тухайн сургуульд суралцаж байсан Пэтти Румфола болохыг тогтоосон ч тэрбээр 2013 онд хорвоог орхисон байжээ. Харин цүнхийг нь түүний хүүхдүүдэд буцаан өгсөн бөгөөд тэд дотроос нь нэг нэг зоосыг дурсгал болгон хадгалж авчээ.
