Монгол Улсын ерөнхийлөгч У.Хүрэлсүх Казахстаны Астана хотод төрийн айлчлал хийж байгаа билээ. Энэхүү айлчлалын ач холбогдлыг судлаач Д.Баярхүүгээс тодрууллаа.
Тэрбээр, “Анх 1992 оны нэгдүгээр сард дипломат харилцаа тогтоож байв. Тэр цагаас хойш Монгол Казахстаны харилцаа өндөр түвшинд хөгжсөн л дөө. Энэ удаагийн айлчлал бол онц ач холбогдолтой. Монгол Улс энхийг эрхэмлэсэн, олон тулгуурт гадаад бодлоготой гэдгийн том илэрхийлэл.
C5 буюу Төв Азийн таван улс өөрөө том ойлголт болчихсон цаг үе. Төв Азийн таван улсын геополитикийн байршил нь дэлхийн гурван том иргэншлийн зааг дээр байдаг. Европ, Хятад, Исламын дунд байдгаараа онцлогтой. Мөн байгалийн баялагийн асар их нөөцтэй. Хөгжил дэвшил нь хурдтай. Хүн төрөлхтөн өнөөдөр хөгжлийн хурдны эрин зуунд ороод ирчихсэн байхад C5 бол дэлхийн том интеграцийн голд ороод ирж байгаа юм. C5+1 гэдэг томъёоллоор АНУ, Япон, Европийн холбоо, Италийн араас Монгол Улс нэмэгдэж хамтын ажиллагаагаа үргэлжлүүлж байна. Монгол Улсын Ерөнхийлөгч У.Хүрэлсүх төв азийн таван орноор айлчиллаа. Тавуулантай нь зэрэг хамтарч ажилласан гэсэн үг. Энэ таваасаа Казахстантай стратегийн түншлэлийн харилцаатай. Укбекстан, Киргизстантай иж бүрэн түншлэлийн харилцаатай. Энэ зун болон Тажекстаны ерөнхийлөгчийн айлчлалын үед дахиад иж бүрэн түншлэлийн харилцаа тогтоох магадлалалтай. 1992 оноос хойш хөгжсөн Монгол Улсын гадаад бодлого өнөөдөр бүрэн бүтэн болсон байна. Төв Ази+1 гээд Азербайжаныг оруулаад ярьж болно. Ерөнхийлөгч яагаад энэ цаг үед Казахстанд айлчилж байгаа вэ гэхээр нэгдүгээрт, хариу айлчлал. 2024 онд Казахстаны ерөнхийлөгч Токаев манай улсад айлчилж стратегийн түншлэл тогтоосны дараах хариу айлчлал гэсэн үг. Хоёрдугаарт, бүс нутгийн дээд хэмжээний уулзалтад хүндэт зочноор уригдсан явдал. Төв азийн таван улс, Армен, Азербайжаны төрийн тэргүүн оролцож буй чухал ач холбогдолтой хурал. Үүнийг онолын үүднээс харвал 7+1 гэж ойлгосон ч болно л доо. Ямар ч байсан дэлхийн геополитикийн нөхцөл байдал хүнд байгаа үед манай улс энхийг сахих гадаад бодлогоо нотлоод ирж байгаа нь ололт гэж үзэж байна” гэлээ.
