Залуусын үйлчлүүлэх дуртай Итали хоолны Алберо ресторан дөрөвдүгээр сарын 11-ний өдөр үүдээ хаахаа мэдэгдлээ. Тэд өөрсдийн цахим хуудастаа дараах мэдээллийг нийтэлжээ.
“АЛБЕРО ресторан маань 6 жилийн турш үйлчлүүлэгч та бүхэнтэйгээ олон сайхан мөч, уулзалт, баяр баясал, халуун дулаан дурсамжийг хамтдаа өнгөрүүлсэн билээ.
Энэ хугацаанд бидэнд итгэл хүлээлгэж, дахин дахин ирж, бидний хөдөлмөрийг үнэ цэнэтэй болгож өгсөн та бүхний дэмжлэг бидний хувьд хамгийн том бахархал байлаа.
Өнөөгийн эдийн засгийн хүндрэл, татвар болон бусад нөхцөл байдлын улмаас үйл ажиллагаагаа цаашид үргэлжлүүлэх боломжгүй болсныг харамсалтайгаар мэдэгдэж байна.
2026 оны 4 сарын 11-ний өдрөөс эхлэн бид үүдээ хаах болж байна.
Алберо зөвхөн ресторан биш, харин дурсамж, мэдрэмж, хүмүүсийн халуун холбоос байсан гэдэгт бид итгэдэг.
Та бүхэндээ цаашдын амьдралд нь аз жаргал, амжилт хүсье.
Бидэнтэй хамт байсан та бүхэндээ үргэлж талархаж явах болноо.
Хүндэтгэсэн,
Алберо ресторан”
