Сагсан бөмбөгийн домогт од, NBA-ийн таван удаагийн аварга Коби Брайант Лос Анжелес хотын ойролцоо нисдэг тэрэгний ослоор амь насаа алдсанаас хойш зургаан жил өнгөрчээ. Тэрээр 2020 оны нэгдүгээр сарын 26-нд 41 насандаа таалал төгссөн юм. Ослын үеэр Коби Брайантын охин Жианна болон бусад зорчигчид мөн амь насаа алдсан нь дэлхий даяарх шүтэн бишрэгчдийг цочирдуулсан гунигт өдөр байсан юм.
Коби Брайант NBA-ийн Лос Анжелес Лэйкерс багт бүх карьераа зориулж, 20 улирал тоглохдоо таван удаа аваргын бөгж хүртэж, хоёр удаа финалын үнэ цэнтэй тоглогчоор шалгарсан. Тэрбээр талбай дээрх сахилга бат, хичээл зүтгэл, ялагчийн сэтгэлгээг илэрхийлсэн “Mamba Mentality” хэмээх үзэл санаагаараа алдартай байв.
Спортын замналаа өндөрлүүлснийхээ дараа Коби Брайант хүүхдийн спорт, боловсрол, уран бүтээлд анхаарч, 2018 онд богино хэмжээний хүүхэлдэйн киноны “Dear Basketball” бүтээлээрээ Оскарын шагнал хүртсэн нь түүнийг талбайн гадна ч онцгой нөлөөтэй хүн байсныг харуулсан юм.
Түүний нэр хүнд, үлдээсэн үзэл санаа өнөөдөр ч дэлхий даяар спортын үе үеийн тамирчдад урам зориг өгсөөр байгаа бөгөөд Коби Брайант зөвхөн агуу тоглогч бус, тууштай хөдөлмөр, мөрөөдөлдөө үнэнч байхын бэлгэдэл болон үлджээ…
