Улсын Их Хурлын Хүний хөгжил, нийгмийн бодлогын байнгын хороо, Соёл, спорт, залуучуудын дэд хороо хамтран хөгжлийн бэрхшээлтэй оюутнуудын эрх, боломж, нийгмийн оролцоог нэмэгдүүлэх асуудлаар “Гэрээсээ гарцгаая-Оюутан” хэлэлцүүлгийг өчигдөр (2025.11.19) Төрийн ордонд зохион байгууллаа.
Их, дээд сургуулийн хөгжлийн бэрхшээлтэй оюутан залуусын төлөөлөл, тэдний эцэг, эх, төрийн болон иргэний нийгмийн байгууллагын төлөөлөл оролцсон уг хэлэлцүүлгийг Улсын Их Хурлын гишүүн, Соёл, спорт, залуучуудын дэд хорооны дарга М.Ганхүлэг даргалж, Улсын Их Хурлын гишүүн О.Саранчулуун, Ж.Баясгалан нар оролцов. Хэлэлцүүлгээр хөгжлийн бэрхшээлтэй залуучуудын боловсролын хүртээмж, энэ талаарх олон улсын туршлага, дэд бүтэц, барилгын саадгүй орчны стандарт, хэрэгжилт болон энэ талаарх эрх зүйн орчны тухай асуудлуудыг хөндөж ярилцлаа.
Саадгүй байдал, хүртээмжийн тухай хуулийн төсөл санаачлан боловсруулж байгаагаа Улсын Их Хурлын гишүүн О.Саранчулуун танилцуулж, батлагдсан хууль тогтоомж, стандарт шаардлагуудын хэрэгжилтийг хангах явдал шинээр хууль, журам батлан гаргахаас илүү чухал байгааг онцолсон юм. Тэрбээр, хөгжлийн бэрхшээлтэй иргэдийн эрхийг хамгаалахын тулд хариуцлагын механизмыг чангаруулах, хэрэгжилтийг сайжруулах шаардлагатайг тэмдэглэлээ.
Монгол Улсад 18-34 насны хөгжлийн бэрхшээлтэй иргэн 18 886 байгаагаас ердөө 436 нь иих, дээд сургуульд суралцаж буй юм. Энэ нь хөгжлийн ялгаатай байдлаасаа үл хамааран иргэд адил тэгш амьдрах хүртээмжтэй орчин бүрдээгүйгээс голлон шалтгаалж байгааг хэлэлцүүлэгт оролцогчид ярьсан юм. Өндөр хөгжилтэй орнуудын их, дээд сургуулиудад хэрэгжүүлдэг хүртээмжийн бодлого, дэмжлэгийн тогтолцооны талаар Хөгжлийн бэрхшээлтэй хүний хөгжлийн ерөнхий газрын дарга Д.Гэрэл танилцуулсан бол дотоодын зарим их, дээд сургуулийн энэ талаарх сайн туршлагыг оюутан, залуучуудын төлөөллөөс харилцан хуваалцав.
Хэлэлцүүлэгт оролцогчид хөгжлийн бэрхшээлтэй залуусын нийгмийн оролцоог дэмжих “Хүртээмж” клуб байгуулан боловсролын байгууллагуудын болон нийтийн эзэмшлийн зам, талбай, амьдрах орчны хүртээмжийн судалгааг улсын хэмжээнд хийж, дүгнэлт гаргах, тулгамдсан асуудлуудыг эрх бүхий байгууллагуудад танилцуулж шийдвэрлүүлэх, саадгүй орчныг бүтээхийн төлөө нэгдэж ажиллахаар боллоо гэж Улсын Их Хурлын Хэвлэл мэдээллийн газраас мэдээлэв.
