Монгол-Солонгосын Политехник коллеж нь хөнгөн аж үйлдвэрийн болон техникийн салбарт мэргэжлийн ажилтан, техникч бэлтгэдэг төрийн өмчийн шаталсан сургалттай сургууль бөгөөд 8 хөтөлбөрийг магадлан итгэмжлүүлсэн. Нийт төгсөгчдийн 68% нь ажлын байранд гарч ажил хөдөлмөр эрхэлж байна.
Тус коллеж байгуулагдсанаасаа хойших 59 жилийн хугацаанд мэргэжлийн ажилтан, дунд боловсролтой мэргэжилтэн 30000 гаруйг бэлтгэн төгсгөсөн. Нэг ээлждээ 1200 суралцагч хичээллэх хичээлийн 1, 2 дугаар байр, 350 хүний багтаамжтай урлаг заал, 3120 мкв спорт заал, 38 лаборатори, дадлагын газар, номын сан, 240 оюутны хүчин чадал бүхий дотуур байртай.
Энэ хичээлийн жилд мэргэжлийн боловсрол, техникийн боловсрол олгох сургалт, захиалгат, насанд хүрэгчдийн сургалтын чиглэлээр 21 мэргэжлээр 1800 гаруй суралцагч, 140 гаруй багш ажилтантайгаар сургалтын үйл ажиллагаа явуулж байна. Үүний 24 нь хөгжлийн бэрхшээлтэй суралцагч суралцаж байна.
“Тэгш хамруулах боловсрол”-ын арга зүйн дэмжлэг үзүүлэх, зөвлөн туслах үйл ажиллагааг Боловсролын ерөнхий газар болон Нийслэлийн боловсролын газрын мэргэжилтнүүд хамтран 2025 оны 11 дүгээр сарын 11-ний өдөр дараах агуулгын хүрээнд зохион байгууллаа.
Зөвлөн туслах ажлын хүрээнд:
Сургалтын орчин нөхцөл, туслах хэрэгсэл, тоног төхөөрөмж, хэрэглэгдэхүүнийг хүртээмжтэй хэлбэрээр бүрдүүлсэн эсэх;
Суралцагчдад боловсрол эзэмшихэд тулгарч буй асуудлын талаар багш, ажилтантай уулзаж санал солилцож, зөвлөгөө өгч ажиллалаа.
Мөн тус коллежийн суралцагчдад Тэгш хамруулах боловсролын чиглэлээрх мэдээлэл, үйл ажиллагаа агуулгын хүрээнд сургалт зохион байгууллаа.
Монгол-Солонгосын Политехник коллеж нь хөгжлийн бэрхшээлтэй суралцагчдыг суралцах нөхцөлийг бүрдүүлэхэд анхааран ажиллаж байна. Үүнд:
Мэргэжил сурталчлах үйл ажиллагааг зохион байгуулж үүгээрээ дамжуулан хөгжлийн бэрхшээлтэй суралцагч суралцаж буй сургуулиудад “Суралцах урилга” хүргүүлэх
Ариун цэврийн өрөөг хүртээмжтэй хэлбэрээр бэлтгэх
Дотуур байранд амьдрах орчин нөхцөлийг бүрдүүлэх зэрэг үйл ажиллагааг үе шаттай хэрэгжүүлэн ажиллаж байна.
