ОХУ-ын Санкт-Петербург хотын шүүх дайны эсрэг дуу дуулсан хэмээн буруутгагдаж буй 18 настай гудамжны дуучин Диана Логиновагийн хорих хугацааг дахин 13 хоногоор сунгажээ. Тэрбээр “Stoptime” хамтлагийн гишүүн бөгөөд “Наоко” нэрээр уран бүтээлээ туурвидаг. Логинова анх 10-р сарын 15-нд баривчлагдсан бөгөөд түүнээс хойш суллагдалгүй хоригдож байна. Шүүх түүнийг “олон нийтийн дэг журам зөрчсөн” болон “Оросын зэвсэгт хүчнийг гутаасан” хэмээн буруутгаж, мөнгөний торгууль ногдуулжээ.
Түүний хамтлагийн гишүүн Александр Орлов ч мөн удаа дараа баривчлагдсан бөгөөд тэд ямар нэг хууль зөрчөөгүй гэж мэдэгдсэн байна.
Amnesty International байгууллага эдгээр давтан баривчилгааг “карусель баривчилгаа” хэмээн нэрлэж, илүү ноцтой ял оноохгүйгээр урт хугацаанд хорих зорилготой “хэлмэгдүүлэлт” гэж шүүмжилжээ. Мөн “Оросын эрх баригчид Наоко, Александр Орлов болон дайны эсрэг үзэл бодлоо илэрхийлсэн бүх гудамжны хөгжимчдийг нэн яаралтай, болзолгүй суллах ёстой” гэж мэдэгдээд буй.
Хүний эрхийн төлөөх байгууллагуудын хэлснээр, Логинова болон түүний хамтлагийнхан Украинд хийж буй дайныг шүүмжилсэн дуугаа гудамжинд дуулсан нь Кремлийн дэмжигчдийн зүгээс гомдол гаргахад хүргэж, улмаар тэднийг баривчлахад хүргэсэн байна.