Монгол хэл хуурын өвийг өвлөн уламжлагч, судлаач, урлаач, тоглооч нарын II дугаар чуулганыг өнөөдөр буюу 2025 оны арваннэгдүгээр сарын 11-ний өдөр Соёлын өвийн үндэсний төвд 08:00–15:00 цагийн хооронд зохион байгуулна. Энэхүү арга хэмжээнд улсын 21 аймаг, нийслэлийн 9 дүүргийн хэл хуурчид, урлаач, судлаачид оролцож, уламжлалт хуурын татлага, ур хийц, судалгааны чиглэлээр туршлага солилцон, өв соёлоо түгээн дэлгэрүүлж байна. Монголчуудын хөгжмийн соёл, язгуур уламжлалын үнэт өв болох хэл хуурыг хойч үедээ өвлүүлэн түгээх, судлан сурталчлах зорилготой уг өдөр нь соёлын дархлаа, үндэсний бахархлыг бэхжүүлэх чухал ач холбогдолтой билээ.
