Энэ удаа Монгол Улсад суугаа Элчин сайдууд болон олон улсын байгууллагын суурин төлөөлөгчид, төрийн байгууллагууд, гадаадын хөрөнгө оруулалттай компаниудын төлөөллүүд оролцож, төрийн цахим үйлчилгээний хүртээмж, гадаадын иргэд болон аж ахуйн нэгжүүдийн тулгамдсан асуудлыг хэлэлцсэн юм.
Хэлэлцүүлгийн үеэр Гадаадын иргэн, харьяатын газар, Татварын ерөнхий газар болон “И-Монгол” академийн төлөөллүүд бизнес эрхлэгчдийн тулгамдсан асуудлыг нээлттэй хэлэлцэв.
Энэ нь технологийн боломж, хэрэглэгчийн туршлагыг уялдуулан “E-BUSINESS 2.0”-ийг илүү үр ашигтай, бизнесийг дэмжигч, хөрөнгө оруулагчдад ээлтэй систем болгон хөгжүүлэхэд чухал ач холбогдолтой алхам боллоо.
“E-Business” платформ нь гадаадын хөрөнгө оруулагчдын Монгол Улсад бизнесээ эхлүүлэх, өргөжүүлэх үйл явцыг илүү хялбар, ил тод, шуурхай болгох нөхцөлийг бүрдүүлж байна.
Тус платформ нь төр болон хувийн хэвшлийн үйлчилгээг нэг цонхоор хүргэх, бизнесийн үйл ажиллагааг бүрэн цахим хэлбэрт шилжүүлэх чухал дэд бүтэц юм.
Мөн “Эдийн засгийн эрх чөлөөний тухай хууль” болон түүнтэй уялдсан 100 гаруй хуулийн төслийг боловсруулж, цахим шилжилтэд саад болж буй эрх зүйн орчныг шинэчлэх чиглэлээр ажиллаж байна. Энэ хэлэлцүүлэг нь энэхүү эрх зүйн шинэчлэлтэй уяалдсан, цаг үеэ олсон чухал арга хэмжээ боллоо.
