Мишель Обама: “Цагаан ордонд байх үедээ хувцаслалт минь анхаарал сарниулах вий гэж санаа зовдог байсан”
АНУ-ын тэргүүн хатагтай асан Мишель Обама Цагаан ордноос гарснаас хойш бараг 10 жилийн дараа өөрийн хувцаслалт, гадаад төрхөнд олон нийт ямар их анхаарал хандуулж байсны талаар “Good Morning America” нэвтрүүлэгт оролцохдоо нээлттэй ярьжээ.
Мөн нэвтрүүлгийн хөтлөгч Робин Робертстай удахгүй хэвлэгдэн гарах “The Look” хэмээх шинэ номынхоо талаар танилцуулсан байна.
“Цагаан ордонд байсан найман жилийн хугацаанд миний хувцаслалт, гадаад төрхөд олон нийт их анхаарал хандуулж байсан. Гэхдээ би тэр талаар ярихыг аль болох цээрлэдэг байсан. Учир нь энэ нь миний ажил, зорилгоос анхаарлыг холдуулах, өөрөөр хэлбэл анхаарлын сэдэв болж хувирах вий гэж айж байлаа” гэж Обама дурджээ.
Тэрээр стилист Мередит Купптэй хамтран бүтээсэн “The Look” номоо хоёр жилийн турш боловсруулсан гэдгийг онцолсон байна. Номыг “Penguin Random House”-ийн нэгэн салбар болох The Crown Publishing Group хэвлэн гаргах бөгөөд арваннэгдүгээр сарын 4-нд худалдаанд гарна. Энэхүү бүтээлд 200 гаруй гэрэл зураг, өмнө нь нийтлэгдэж байгаагүй зургууд ч багтжээ.
Мишель Обама номоо өнгөрсөн зургадугаар сард анх зарлахдаа “гадаад төрхтэй холбоотой яриаг өөрийн өнцгөөс дахин тодорхойлох” зорилготой байгаагаа илэрхийлсэн юм.
“Би одоо өөрийгөө чөлөөтэй илэрхийлэх насандаа хүрсэндээ баяртай байна. Би өөрт таалагдсанаа өмсөж, өөрийнхөөрөө байхыг хүсдэг. Энэ бүхнээс сурсан зүйлсээ хуваалцахдаа баяртай байна” гэж тэр инстаграм хуудаснаа бичжээ.
Обама 2009–2017 онд нөхөр Барак Обама АНУ-ын Ерөнхийлөгчөөр ажиллаж байх үед тэргүүн хатагтай байсан билээ.
Цагаан ордноос гарсныхаа дараа тэрээр “Becoming” хэмээх дурсамжийн номоо хэвлүүлж, дэлхий даяар аялсан бөгөөд энэ үеэр түүний хувийн загвар, хэв маяг дахин олны анхаарлын төвд орсон юм
Мишель Обама “Becoming”, “The Light We Carry: Overcoming in Uncertain Times” зэрэг бестселлер бүтээлүүдийн зохиогч бөгөөд “The Look” нь түүний гурав дахь ном юм.
ABC news
