Нийслэлийн Засаг даргын орлогч А.Амартүвшин Түлш хэрэглэгчдэд үйлчлэх төвд ажиллалаа.
Энэ үеэр нийслэлийн Засаг даргын орлогч А.Амартүвшин “Улаанбаатар хотод 172 мянган айл түлш хэрэглэж байна. Үүнээс 110 мянган айл нь угаар мэдрэгч ухаалаг төхөөрөмжтэй. 17 мянган айлд угаар мэдрэгч төхөөрөмж суурилуулж байна. Энэ онд багтаан түлш түлж байгаа бүх айлд угаар мэдрэгч суурилуулж дуусна. Угаар мэдрэгч төхөөрөмжөөс ирэх дохиог түлш хэрэглэгчдэд үйлчлэх төвд хянадаг. Операторууд 24 цагаар ээлжлэн ажилладаг тул дэлгэцэд гарч ирсэн дохио бүрийг алдалгүй арга хэмжээ авч, дохио ирсэн даруйд тухайн айл руу холбогддог. Ингээд сэрэмжлүүлэг, зөвлөгөө өгдөг. Хэрэв тухайн айлтай утсаар холбогдож чадаагүй бол гэрээт ажилтнууд очдог. Нийслэлд галлагааны улирал эхэлснээс хойш угаарын хий ялгарсан 96 тохиолдолд гэрээт ажилтнууд очиж ажилласан байна. Есдүгээр сарын 15-аас хойш есөн хүн угаартаж нас барсан харамсалтай явдал болсон. Айлууд угаарын хий мэдрэгчээ унтраасан зэрэг зөрчил түлхүү илэрдэг” гэлээ
“Түлш хэрэглэгчдэд үйлчлэх төв” ОНӨААТҮГ нь 7010-9410 дугаарт засвар үйлчилгээний дуудлага хүлээн авдаг. Угаарын хий галлагаа эхлэх болон дуусах үед ихээр ялгарч энэ үеэр дуудлага ирэх нь түгээмэл байдаг аж.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
