Бразилын Рио-де-Жанейро хотод зохион байгуулалттай гэмт бүлэглэл, хар тамхины наймаачдыг онилсон цагдаагийн ажиллагааны үеэр дор хаяж 121 хүн амиа алдсан гэж тус улсын цэргийн цагдаагийн байгууллага лхагва гарагт мэдээллээ. Мөн 56 хүнийг баривчилсан гэж цагдаа нар мэдэгдсэн байна.
Энэхүү ажиллагаа мягмар гарагт явагдсан ч, цэргийн цагдаа болон Бразилын эх сурвалжуудын мэдээлснээр, хохирогчдын тоо лхагва гарагт улам нэмэгдэх төлөвтэй байжээ.
Цагдаагийн мэдээлснээр, ажиллагаа Рио-де-Жанейрогийн мужийн хэд хэдэн дүүрэгт, тэр дундаа Комплексу ду Алемао болон Пенья зэрэг хороонд зохион байгуулагдсан байна. Энэ нь тухайн бүс нутгийн хар тамхины наймаа, гэмт бүлэглэлүүдийн үйл ажиллагааг зогсоох зорилготой байжээ. Операцид 2500 орчим цагдаа, тусгай албаныхан оролцсон бөгөөд хуягт техник ашиглагдсан байна.
Лхагва гарагт болсон ажиллагааны дараа амиа алдсан хүмүүсийн цогцсыг гэр бүлүүдэд нь таних боломж олгохын тулд газар дээр нь эгнүүлэн байрлуулсан тухай Бразил дахь эх сурвалж мэдээлжээ. Цагдаагийнхны хэлснээр, энэ бол Рио-де-Жанейро мужид хэзээ ч хийгдэж байгаагүй хамгийн олон хүний аминд хүрсэн цагдаагийн ажиллагаа юм.
Мужийн засгийн газар энэхүү ажиллагааг хар тамхины наймаа эрхэлдэг “Командо Вермельо” (Comando Vermelho) гэмт бүлэглэлийг онилсон хамгийн том ажиллагаа гэж тодорхойлжээ.
Бразилын Ерөнхийлөгч Луис Инасиу Лула да Силва уг ажиллагааны үеэр олон хүн амиа алдсанд “гүн цочирдсон” бөгөөд ийм хэмжээний ажиллагаа холбооны засгийн газрын мэдлэг, оролцоогүйгээр явагдсан явдалд гайхширсан гэж Хууль зүйн сайд Рикардо Левандовски Reuters-т орчуулан дамжуулсан мэдэгдэлдээ дурджээ.
Энэхүү ажиллагаа Бразилд болох олон улсын томоохон арга хэмжээний өмнөхөн болж байна. Ирэх долоо хоногт Рио-де-Жанейрод C40 дэлхийн хотын дарга нарын дээд хэмжээний уулзалт болон Их Британийн ханхүү Уильямийн “Earthshot Prize” шагнал гардуулах ёслол зохион байгуулагдах бол, Уур амьсгалын асуудлаарх НҮБ-ын COP30 бага хурал ирэх 11 сарын 10-наас 21-ний хооронд Бразилын хойд хэсгийн Белем хотод болох юм.
НҮБ-ын Ерөнхий нарийн бичгийн дарга олон хүн амь үрэгдсэнд гүнээ санаа зовниж буйгаа илэрхийлсэн талаар түүний хэвлэлийн төлөөлөгч Стефан Дюжаррик мэдэгдэлдээ дурджээ.
Тэрээр мөн “Цагдаагийн ажиллагаанд хүч хэрэглэх нь олон улсын хүний эрхийн хууль, хэм хэмжээнд нийцсэн байх ёстой” хэмээн онцолж, эрх баригчдыг уг хэргийн талаар яаралтай, ил тод мөрдөн шалгахыг уриалсан байна.
Эх сурвалж: Abc news
