Хятадын Шинжлэх ухааны академийн харьяа Металлын судалгааны хүрээлэнгийн эрдэмтэд “Global Times”-т мэдээлснээр, тус улс удирдлагатай цөмийн нэгдлийн технологийн гол бүрэлдэхүүн хэсэг болох “хиймэл нар” төслийн хүрээнд чухал материалын хөгжүүлэлтэд томоохон дэвшил гаргажээ.
Сүүлийн үед профессор Рон Лижиан тэргүүтэй судалгааны баг хоёрдугаар үеийн өндөр температурт хэт дамжуулагч туузанд ашиглагддаг металл суурийн техникийн бөглөрөлийг шийдсэн, дотоодын шинэ цэвэршүүлэх технологийг амжилттай боловсруулсан байна. Ингэснээр өндөр цэвэршилттэй, тонн хэмжээний Hastelloy (C276) металл суурийг үйлдвэрийн түвшинд үйлдвэрлэх чадварт хүрсэн гэж тус багийн мэдэгдэлд дурджээ.
Удирдлагатай цөмийн нэгдлийн төхөөрөмж буюу “хиймэл нар” нь хүн төрөлхтний ирээдүйн цэвэр эрчим хүчний хамгийн ирээдүйтэй шийдлүүдийн нэг хэмээгддэг. Эдгээр төхөөрөмжид ашиглагддаг хоёрдугаар үеийн өндөр температурт хэт дамжуулагч тууз нь хүчирхэг соронзон орон үүсгэх үндсэн материал бөгөөд тэдгээргүйгээр 100 сая хэмээс давсан халуун плазмыг хязгаарлах боломжгүй юм.
“Манай баг өндөр цэвэршилттэй хайлш боловсруулах чиглэлээр бараг 20 жилийн туршлагатай. Маш бага хольцтой хайлш үйлдвэрлэх нь урт, нимгэн металл суурь бүтээх гол түлхүүр юм. Энэхүү суурийн боловсруулалтын хүндрэлүүдийг даван туулахад бид хоёр жил хүрэхгүй хугацаа зарцуулсан” гэж профессор Рон хэлжээ.
Хятад улс өндөр температурт хэт дамжуулагч материалын хоёрдугаар үеийн технологийн хөгжүүлэлт болон хэрэглээний чиглэлээр дэлхийд тэргүүлэгчдийн нэгт тооцогддог. Гэсэн хэдий ч уг туузны үйлдвэрлэлд хэрэглэгддэг C276 төрлийн металл суурийг урьд нь голчлон гадаадаас импортолдог байсан нь өндөр өртөгтэй, нийлүүлэлтийн тогтворгүй байдлыг үүсгэдэг байв гэж тэрбээр тэмдэглэсэн байна.
Металл суурь нь хэт дамжуулагч болон буфер давхаргуудыг байрлуулах үндсэн суурь үүрэгтэй бөгөөд барилгын суурь шиг ажилладаг гэж судлаачид тайлбарлажээ. Тус суурь нь туузны механик бат бөх чанарыг хангахаас гадна бүхэл бүтэн хэт дамжуулагч бүтэц тогтвортой бүрэлдэхэд чухал нөлөөтэй юм.
Судалгааны багийн боловсруулсан хэт цэвэр хайлш нь нүүрстөрөгч, марганц, хүхэр, фосфор, хүчилтөрөгч, азот зэрэг хольц маш бага агуулах бөгөөд ижил төрлийн импортын материалаас илүү цэвэршилттэй байна. Нийт цэвэршилтийн түвшин нь олон улсын стандартад нийцэж, зарим үзүүлэлтүүд нь гадаадын бүтээгдэхүүнээс давсан гэж мэдээлжээ.
Судлаачдын мэдээлснээр хүрээлэн “East Super Superconducting Technology Co.” компанитай 20 тонн C276 суурь нийлүүлэх хүрээнд хамтын ажиллагааны гэрээ байгуулсан бөгөөд хоёр тал үйлдвэрлэлийн технологийг улам сайжруулах, дотоодын хэрэглээг өргөжүүлэх чиглэлээр хамтран ажиллах юм байна.
Гадаад хэргийн яамны төлөөлөгч Мао Нин аравдугаар сарын 25-нд “X” платформд мэдээлэхдээ, Хятад улс Аньхуй мужийн Хэфэй хотод “хиймэл нар” барьж буйг онцолжээ. Түүний хэлснээр “Burning Plasma Experimental Superconducting Tokamak” нэртэй энэхүү төхөөрөмж 2027 онд бүрэн дуусах төлөвтэй бөгөөд хүн төрөлхтний түүхэнд анх удаа цөмийн нэгдлээс цахилгаан үйлдвэрлэх төхөөрөмж болох боломжтой гэжээ.
Global times
