Apple компани дэлхийн цөөн хэдэн хувьцаат компанийн тоонд багтан, зах зээлийн үнэлгээ нь 4 их наяд ам.доллар давсан гэдгийг энэ долоо хоногт баталлаа. Ингэснээр тус компани энэ босгыг өмнө нь давсан Microsoft болон Nvidia-гийн дараа технологийн аваргуудын эгнээнд нэгдэж байна.
Apple (AAPL)-ийн хувьцааны үнэ мягмар гарагт 0.1 хувиар өсөж, компанийн үнэлгээг шинэ дээд түвшинд хүргэсэн бөгөөд энэ өсөлт нь iPhone 17-ийн борлуулалт, тэр дундаа өмнө нь сул үзүүлэлттэй байсан Хятадын зах зээлд гарсан амжилтаар дэмжигджээ.
Энэ нь 2025 оны эхээр компанийн хувьцаа унаж, ерөнхийлөгч Дональд Трампын тарифууд, хиймэл оюун (AI)-ны бүтээгдэхүүний хоцрогдол, дотоодын үйлдвэрлэлийн дарамт зэрэг асуудлуудтай нүүр тулсан үеийн байдалтай харьцуулахад огт өөр дүр зураг юм. Тухайн үед Apple компанийн үнэлгээ нэг өдрийн дотор 310 тэрбум ам.доллараар буурч байсан билээ.
Гэсэн хэдий ч Apple-ийн сэргэлт нь iPhone одоог хүртэл хэрэглэгчид болон хөрөнгө оруулагчдыг татсаар байгаагийн шинж гэж шинжээчид үзэж байна.
Apple-ийн шинэ дээд амжилт нь хиймэл оюун ухааны (AI) хөөрөгдөл технологийн салбарын үнэлгээг тэнгэрт тулгаж буй энэ үед гарч байгаа юм. Nvidia болон Microsoft зэрэг AI технологид түлхүү төвлөрч буй компаниуд 4 их наядын босгыг түрүүлж давсан нь Уолл Стрийтэд AI-ийн ач холбогдол хэр өндөр байгааг харуулж байна.
Apple өмнө нь ч зах зээлийн үнэлгээгээрээ түүхэн амжилтуудыг гаргаж байсан. Тус компани 2018 оны наймдугаар сард анхны 1 их наяд ам.долларын үнэлгээтэй хувьцаат компани, 2020 онд 2 их наяд, 2022 онд 3 их наядын босгыг давсан бөгөөд 2023 оны зургаадугаар сард л энэ түвшинд албан ёсоор хаалт хийж байжээ. Гэсэн хэдий ч одоогоор iPhone л Apple-ийг шинэ өндөрлөгт хүргэж байгаа гэж шинжээчид дүгнэж байна.
Wedbush Securities-ийн шинжээч Дэн Айвс “Бидний хувьд Тим Күүк болон түүний баг iPhone 17-оороо амжилт олсныг харж байна. Харин одоо Уолл Стрийт тэдний хиймэл оюуны стратегийн том зураглалыг хүлээж байна” гэж 10 дугаар сарын 20-ны мэдэгдэлдээ онцолжээ.
