Таны гар утасны дэлгэц дээр “5G” гэсэн тэмдэг гарч ирэхэд та өндөр хурдтай интернетэд холбогдож байна гэж боддог уу? Гэвч шинэ судалгаагаар энэ тэмдэг үргэлж жинхэнэ 5G холболтыг илтгэдэггүй болох нь тогтоогджээ.
Анх 5G технологи нэвтрэхдээ “илүү хурдан таталт, сааталгүй стрийминг, шуурхай холболт” амлаж байсан. Төр засаг болон үүрэн холбооны операторууд энэ салбарт ихээхэн хөрөнгө оруулсан ч, 5G нь өндөр хурдыг зөвхөн богино зайнд хүргэдэг учраас олон антенн шаардлагатай болдог. Тиймээс хэрэгжилт нь удаан, сүлжээний хамрах хүрээ бүрэн тогтворжоогүй хэвээр байна.
Судалгааны байгууллагийн мэдээлснээр, утасны дэлгэц дээрх “5G” тэмдэг гарч байсан хугацааны 40 орчим хувьд нь тухайн төхөөрөмж 4G холболт ашиглаж байжээ. Өөрөөр хэлбэл, та 5G үйлчилгээний төлбөр төлж, дэлгэц дээрээ 5G тэмдэг харж байж болох ч таны утас хуучин, удаан 4G сүлжээг ашиглаж байх магадлалтай.
Онолын хувьд 5G нь секундэд 20,000 мегабит хурдтай, нэг минут хүрэхгүй хугацаанд 18 HD кино татах чадвартай байх ёстой. Гэвч бодит хэрэглээний хувьд олон хэрэглэгчийн хурд үүнээс хавьгүй доогуур байна.
Шинжээч Мартин Симсийн хэлснээр, утсан дээр гарч буй “5G” тэмдэг нь тухайн бүсэд 5G дохио байгаа гэдгийг л илтгэдэг, харин утас чинь үнэхээр түүнд холбогдсон гэсэн баталгаа биш гэдгийг онцолсон байна.
Тиймээс “5G” гэж гарлаа гээд өндөр хурдтай холбогдсон гэж найдахын оронд, хэрэглэгчид бодит хурд, сүлжээний чанараа шалгаж байх нь зүйтэй гэж мэргэжилтнүүд зөвлөж байна.
