Өвлийн улиралд Улаанбаатар хот дэлхийд агаарын бохирдлоор тэргүүлэх хэмжээнд хүрдэг. Өөрөөр хэлбэл PM2.5 тоосонцрын агууламж ДЭМБ-ын зөвлөмжөөс 10–25 дахин өндөр гарч, иргэдийн уушги, зүрх судасны тогтолцоонд өдөр бүр ноцтой нөлөөлдөг гэсэн үг. Маск зүүх, агаар цэвэршүүлэгч хэрэглэхээс гадна хоол хүнсээр дамжуулан утааны хор нөлөөнөөс сэргийлэх нь бас нэг чухал зүйл юм. Учир нь зөв хооллолт нь биеийн дархлааг дэмжиж, уушги болон эд эсийн гэмтлээс урьдчилан сэргийлэхэд чухал нөлөө үзүүлдэг.
Антиоксидантаар баялаг хүнс
Юуны өмнө антиоксидантаар баялаг хүнсийг түлхүү хэрэглэх шаардлагатай. Үүнд, жимс жимсгэнэ, чацаргана, нэрс, аньс, үхрийн нүд, бууцай, брокколи, байцаа, яншуй зэрэг ногоон навчит хүнс. Нимбэг, киви, жүрж, мандарин зэрэг жимс. Сармис, сонгино зэрэг хүнс орох бөгөөд өдөр тутамдаа хэрэглэх нь уушги, дархлааны системийг хамгаалах ач холбогдолтой.
Омега-3 тосны хүчил
Дараагийн нэг чухал элемент бол Омега-3 тосны хүчил юм. Энэ нь уушги болон судасны үрэвслийг багасгах үйлчилгээтэй. Омега-3 ихтэй хоол хүнсэнд яргай, хулд, май, туна зэрэг тослог загас, самар, үр тариа, маалингын үр зэрэг орно. Судалгаагаар Омега-3 тогтмол хэрэглэдэг хүмүүсийн уушгины үрэвслийн түвшин утаанд өртөх үед мэдэгдэхүйц бага байдгийг тогтоосон байдаг. Хэрэв шаардлагатай бол эмчийн заавраар Омега-3 нэмэлт тос хэрэглэж болно.
Шингэн зүйл тогтмол уух
Агаарын бохирдлын хорт бодисууд бөөр, элгээр дамжин гадагшилдаг тул хангалттай шингэн уух нь чухал. Өдөрт дор хаяж 1.5–2 литр ус уух, ногоон цай, нимбэгтэй ус, чацарганы шүүс зэрэг антиоксидантаар баялаг шингэн зүйл хэрэглэж занших хэрэгтэй.
ХЭРЭГЛЭЖ БОЛОХГҮЙ ХҮНС
Нөгөө талаас, агаарын бохирдлын улиралд зарим төрлийн хүнс нь биеийн үрэвслийг нэмэгдүүлж, нөхцөл байдлыг дордуулах эрсдэлтэй. Боловсруулсан болон тосонд шарсан хүнс, их хэмжээний давс, элсэн чихэр, газтай, чихэрлэг ундаа, архи, тамхи зэрэг нь уушгинд давхар ачаалал өгдөг тул аль болох хязгаарлах шаардлагатай.
-Боловсруулсан, шарсан тослог хоол
-Давс, элсэн чихрийн хэт их хэрэглээ
-Газтай, чихэрлэг ундаа
-Архи, тамхи — уушгинд давхар ачаалал өгдөг
Агаарын бохирдол өндөртэй орчинд зөв хооллолт нь масктай адил хамгаалалт болдог гэж хэлж болно. Антиоксидант ихтэй хүнс, Омега-3 тосны хүчил, хангалттай шингэн уух дадлыг хэвшүүлснээр уушги, зүрх судасны тогтолцоо болон дархлааг дэмжиж, утааны хор нөлөөг мэдэгдэхүйц бууруулах боломжтой. Улаанбаатарын өвлийн утааны улиралд хоол хүнсээ ухаалгаар сонгох нь эрүүл мэндээ хамгаалах хамгийн бодит, үр дүнтэй алхам юм.