Хиамчин. Улс төрд өрнөж буй үйл явдлын тухай цахим ертөнцөд идэвхтэй бичдэг хүмүүсийг “хиамчин” гэж нэрлэх, шуудхан хэлэхэд шоглож харагддаг. Цахим орчинд төлбөртэй сэтгэгдэл бичиж, мэдээлэл хуваалцдаг хүмүүсийг хэлээд байгаа юмуу даа. Тролл, бот, хөлсний бичээч гээд олон нэр төрөл байдаг ч “хиамчин” гэдэг үг хаанаас үүсэлтэй вэ гэдэг сонирхол татав.
Шилдэг нийтлэлчдийн клуб baabar.mn-ийн нийтлэлч “Таяр” буюу Д.Батбаяраас асуувал бодит хариулт авч чадах юм шиг санагдаад түүн рүү холбогдлоо л доо. Хэд хэдэн удаа “хиамандаа хахлаа”, “хортой хиам” гэх мэт үг оруулан “пост” бичихийг нь харсан удаатай билээ.
Тэрбээр, “Сошиал маркетингийн том түүл /tool/, "хиамчин" гэдэг нь Махимпекс сошиал маркетинг хийлгээд хөлсөнд нь хиам өгсөнөөс үүдэлтэй. Уул нь маркетингийн түгээлтийн л нэг арга. Авчиг Оюун-Эрдэнэ ЕС болсноосоо хойш хэт олноор нь худалдан авч, мэдээллийн түрэмгийлэл хийсэн, тараасан мэдээлэл нь бодитой байдалтай нийцэхгүй байсан учраас сүүлдээ нэр хүнд нь унасан. Одоо бол хиамчдыг бүгд "Худалч, шижээргүй, ичгүүргүй" гэж боддог болсон. Уул нь өнөөдөр хүн төрөлхтний хэрэглэж байгаа гол суваг” гэж хариулав.
Тэгвэл мэргэжлийн талаас энэ ойлголтыг тайлбарлах боломжтой эсэх талаар Монголын сэтгүүлчдийн нэгдсэн эвлэлийн Нарийн бичгийн дарга Б.Ууганбаяраас асуув.
Тэрбээр, “ХИАМЧИН. Энэ үг яг хэзээ, хэн гаргаж ирээд тавьсан бэ гэхээр эзэн биегүй. Нийгмийн сүлжээ хөгжих явцтай зэрэгцэн бий болсон нэр томьёо гэх үү дээ. Хиамчин гэх хэлцийг би анх твиттер буюу одоогийн Х дээр олж харсан. Тэнд хэсэг бүлэг хувь хүмүүс нэгдэж, нэг зорилгоор асуудлыг сэвж эхэлдэг байдал түгээмэл болж эхлэхтэй зэрэгцэн дээрх нэр түгж эхэлж байв. Тэд бол зөвхөн Х уншиж, тэнд мэдэмхийрдэг хэсэгхэн бүлэг хүмүүсийн л үйлдэл. Хэвлэл мэдээллийн салбар бол бизнес. Энэ бизнест орлого олох цөөн эх үүсвэр байдаг. Гэхдээ хэвлэл мэдээллийн байгууллага бүр бүтээгдэхүүнээ ил зарлаж, үнэ төлбөрөө нээлттэй байршуулсан байдаг. Та дурын сайт руу ороод борлуулах бүтээгдэхүүн, түүний үнийг харж болно. Тэгэхээр хиамчин гэдэг ойлголт бол хэвлэл мэдээллийн байгууллагад огт хамаарахгүй гэсэн үг. Тэр дундаа телевиз, сайт, сонин, радио бол энэ ойлголтоос ангид бөгөөд үндсэн сэтгүүл зүйн зарчим, ёс зүйг мөрдөж, бас бизнес эрхэлж байгаа салбар. Харин хувь хүний тухай яриа бол хиамчин гэдэг ойлголтод орж ирээд буй гэж хардаг. Тэр дундаа хэсэг бүлэг нийлж, нэг зорилгоор төлбөрт нөлөөлөл үзүүлж буй хэсэг. Үүнд сэтгүүлчид хутгалдахгүй, ангид байх л ёстой зарчим юм” гэж хариулав.