Бидний өдөр тутмын амьдралд 15 минут бол инстаграм, фейсбүүкийн newsfeed гүйлгээд л өнгөрөх хугацаа. Гэхдээ энэ 15 минутаа ном уншихад зориулбал таны амьдрал хэрхэн өөрчлөгдөж болох талаар хуваалцъя.
1. Стресс буурна
University of Sussex-ийн хийсэн судалгаагаар ердөө 6 минут ном уншихад хүний зүрхний цохилт тогтворжиж, булчин суларч, стрессийн түвшин 68 хүртэл хувиар буурдаг болохыг тогтоожээ. Мөн ном уншсанаар сэтгэл зовоосон зүйлс нэг мэдэхэд ямар ч ач холбогдолгүй болох, амьдралаа шинээр харах, өөрт шинэ хүч мэдрэгдэх үе ч тохиолддог.
2. Төвлөрөл нэмэгдэнэ
Дэлгэцийн хэрэглээ, мэдээ мэдээллийн хэт их урсгал дунд анхаарал сарних нь энгийн үзэгдэл болсон. Харин ном уншиж байх үед номд гарч буй үйл явдалд бүх оюунаа төвлөрүүлдэг. Энэ нь тархины “фокус” булчинг дасгалжуулж, ажил болон хичээлд үр дүнтэй төвлөрөх чадварт нэмэр болдог байх нь ээ.
3. Үгийн баялаг тэлнэ
Нэгэн судалгаанд тогтмол уншдаг оюутнууд бусдаасаа дунджаар 20–30% илүү үгийн нөөцтэй байдаг гэж онцолсон байдаг. Ном уншихын хэрээр хүний санаа бодол арвижиж, илүү нарийн ширийн оновчтой үгээр ярих чадвартай болдог. Энэ нь зөвхөн уран ярианд бус, өөрийгөө илүү итгэлтэйгээр илэрхийлэхэд чухал нөлөө үзүүлнэ.
4. Нойр нь хүрэхгүй байвал ном унш
Өнөө цагт бүх насныхан л нойргүйдэлтэй тэмцэж байна. Гэтэл нойр гэдэг амьдралын чанарт хамгийн чухал зүйлсийн нэг. Харин ном унших нь тархийг тайвшруулдаг учир нойр тань хулжаад байвал утас үзэх биш ном уншихыг сонгоорой. Өдөр ч, орой ч ном бариад хэвтэхэд номд анхаарал төвлөрч, нойрыг тань хүргэх болно.
5. Тархины дасгалжуулагч
Хүний тархи булчин шиг байнга дасгал шаарддаг. Тогтмол ном уншдаг хүмүүсийн тархины холбоос идэвхтэй байж, мэдээлэл дамжуулалт хурдан, ухаан сэргэг байдаг. Харин уншихгүй бол эдгээр холбоос унтаа байдалд орж, тархи болон биеийн үйл ажиллагаа удааширч хөгшрөлт түргэсдэг. Хүн оюунаараа амьтнаас ялгарч, мэдлэг боловсролынхоо хүчээр урт насалдаг. Эрт цагт боловсролгүй, байгалийн амьдралтай хүмүүс богино насалдаг байсан бол өнөөдөр өндөр хөгжилтэй орны иргэд жар хүрээд ч ухаан санааны доройтолд орохгүйн тулд эмнэлэгт найдах бус, номын клубт идэвхтэй оролцох болсон байна.
