2025 оны тавдугаар сарын 26-наас эхлэн Япон улс шинээр төрсөн хүүхдэд “хэт өвөрмөц”, ойлгомжгүй дуудлагатай нэр өгөхийг хязгаарлах шинэ журам хэрэгжүүлж эхэллээ.
Тус журам нь эцэг эхчүүдийг хүүхдийн нэрэнд ашиглаж буй канжи тэмдэгтүүдийн дуудлагыг зөвхөн албан ёсоор зөвшөөрөгдсөн хэлбэрээр бүртгүүлэхийг шаарддаг бөгөөд хэт хэвийн бус, “киракира нэр” гэж нэрлэгддэг өвөрмөц, гадаад үг хэллэгтэй дуудлагуудыг хориглохоор тусгажээ.
Журамд дурдсанаар хэрэв нэрний дуудлага уламжлалт бус байвал эцэг эх тухайн нэрийн утга агуулгыг бичгээр тайлбарлах шаардлагатай болно. Үүний үндсэн дээр захиргааны байгууллага уг нэрийг бүртгэхээс татгалзах эрхтэй болж байна.
Сүүлийн жилүүдэд Японд “Пикачу” (алдарт Pokémon дүр), “Акума” (чөтгөр гэсэн утгатай), “Пурин” (пудинг), “Наики” (Nike брэнд) зэрэг нэрийг хүүхдэд өгөх тохиолдол нэмэгдсэн нь нийгмийн зүгээс шүүмжлэл дагуулж байсан юм.
Энэхүү шинэ журмыг хэрэгжүүлснээр олон нийтийн үйлчилгээний байгууллагуудын ажилд үүсдэг хүндрэлүүдийг багасгах, мөн хүүхдүүдийн ирээдүйд нийгмийн дунд нэрнээс үүдсэн сөрөг нөлөөллийг бууруулах зорилготой гэж Японы дотоод хэргийн яам мэдэгдсэн байна.