Apple компани 2025 оны намар танилцуулахаар төлөвлөж буй “iPhone 17” цуврал нь өмнөх загваруудаас өндөр үнэтэйгээр худалдаанд гарах төлөвтэй байгааг олон улсын эх сурвалжууд мэдээлж байна. The Wall Street Journal, MacRumors, TechRadar зэрэг томоохон эх сурвалжуудын мэдээлснээр Apple шинэ загваруудынхаа үнийг өсгөхөөр судалж байгаа бөгөөд үүний шалтгааныг дизайны томоохон өөрчлөлт, хиймэл оюун ухаанд суурилсан шинэ функцүүд, дотоод бүтэц дэх шинэчлэлүүдтэй холбон тайлбарлажээ.
Энэ намар танилцуулагдах шинэ загварууд “iPhone 17” хэмээн нэрлэгдэх бөгөөд “iPhone 16 Plus”-ийн оронд илүү нимгэн хийцтэй шинэ загвар худалдаанд гарна. Одоогийн байдлаар iPhone 16 загвар 799 ам.доллараас эхэлдэг бол хамгийн өндөр үнэтэй iPhone 16 Pro Max нь 1199 ам.доллароос эхэлдэг байна.
Харин удахгүй гарах iPhone 17 загвар нь $999, iPhone 17 Pro загвар $1,099, харин хамгийн өндөр үзүүлэлт бүхий iPhone 17 Pro Max буюу магадгүй шинэ нэршил болох “iPhone 17 Ultra” загвар $1,299-аас дээш үнэтэйгээр худалдаанд гарч магадгүй байна. Зарим шинжээчдийн үзэж байгаагаар АНУ-ын Хятадаас оруулж буй бүтээгдэхүүнд ногдуулсан тарифын улмаас iPhone 17 Pro Max загварын үнэ $2,300 хүрэх эрсдэл ч бий гэж TomsGuide онцолжээ.
