“Үзэсгэлэнт Амитава” НҮТББ-аас Хөвсгөл аймгийн Тариалан суманд энэ сарын 15–16-ны өдрүүдэд “Хүүхэд бүр тэгш эрх, оролцоо – Хүүхэд хамгаалал” сэдэвт зөвлөгөөнийг зохион байгууллаа. Зөвлөгөөнд ерөнхий боловсролын сургуулийн 8–12-р ангийн сурагчид, багш сурган хүмүүжүүлэгчид, төрийн албан хаагчид, төлөөлөл, эцэг эх, асран хамгаалагчид зэрэг 300 гаруй оролцогч хамрагдсан бөгөөд хүүхдийн эрх, тэгш оролцоо, хамгаалал, сэтгэл зүй, эрүүл мэнд, хууль эрх зүйн үйлчилгээний хүртээмжийг сайжруулах хүрээнд сургалт, хэлэлцүүлгийг зохион байгуулсан байна.
12 хүүхэд өөрсдийн санал санаачилгыг шат шатны байгууллагад илэрхийлж, бодлого тодорхойлогчдын анхааралд хүргэсэн нь зөвлөгөөний онцлох хэсэг байв. Мөн ахлах ангийн сурагчдад мэргэжил сонголт, өөрийгөө илэрхийлэх ур чадвар, нөхөн үржихүйн боловсрол, хууль эрх зүйн зөвлөгөө зэрэг олон чиглэлээр сургалтыг зохион байгууллаа. Бага ангийн сурагчдад буюу 10 бүлэгт амны хөндийн эрүүл мэндийн практик сургалт, хийж зорилтот бүлгийн хүүхдүүдэд шүдний үзлэгийг “Med help” болон “Tooth Tooth care dental clinic” эмнэлгийн эмч нар зохион байгуулж, 55 хүүхдэд фтор түрхлэг тавьж, зөвлөгөө өгч ажилласан ба ахлах ангийн хөвгүүдийг дотуур үзлэгт хамруулжээ.
Зөвлөгөөнд дараах мэргэжилтнүүд оролцож, илтгэл тавьж, туршлага солилцон, хэлэлцүүлэг өрнүүлсэн байна. Үүнд:
• Д.Ундраа – ХЭҮК-ын Иргэний нийгмийн зөвлөлийн гишүүн
• Ч.Лхагвасүрэн – “Үзэсгэлэнт Амитава” НҮТББ-ын тэргүүн, Тариалан сумын ИТХ-ын төлөөлөгч
• Ж.Үйлст – Сэтгэл зүйч
• Л.Нямдулам – “Энэрэл” эмнэлгийн хүний их эмч
• Ж.Буянтөгс – Кино найруулагч
• Т.Ууганчимэг – “Tooth care dental clinic эмнэлгийн шүдний эмч, нүүр амны эрүүл ахуйч
• Б.Ганзориг – Хөвсгөл аймгийн Цагдаагийн газрын УСШУ тасгийн дарга
• Б.Бямбахишиг – Хүүхдийн асуудал хариуцсан мэргэжилтэн
• П.Эрхэмбаяр – Өмгөөлөгч
• Д.Дамдинсүрэн – “Gej yu ve”хамтран үүсгэн байгуулагч, “Paddle Mongolia” компанийн гүйцэтгэх захирал нар оролцлоо.
