Дундговь аймгийн ИТХ-ын дарга Ж.Мөнхчулуун, Төлөөлөгч, Зөвлөлийн гишүүн, Ёс зүйн хорооны дарга Ц.Хүрэлбаатар, Төлөөлөгч, Зөвлөлийн гишүүн, Хөдөөгийн сэргэлт, хот төлөвлөлт, дэд бүтцийн хорооны дарга Т.Мөнхбаяр, Төлөөлөгч, Хөдөө аж ахуй, Уул уурхай, Байгаль орчны хорооны дарга П.Түвшин, Төлөөлөгч, Зөвлөлийн гишүүн С.Доржпүрэв зэрэг зочид НИТХ-ын Зөвлөлийн хуралдааны үйл явдалтай танилцлаа.
НИТХ-ын дарга А.Баяр зочдыг хүлээн авч “Дуу хуурын өлгий нутгийн зон олон, иргэдийн ахуй амьдрал, нийгэм, эдийн засгийн орчныг сайжруулахын төлөө нэгдмэл үзэл санаагаар ажиллаж байгаа та бүхэнд ажлын амжилт хүсье. Дундговь аймаг бол байгалийн үзэсгэлэнт газруудаа түшиглэн аялал жуулчлалын салбараа түлхүү хөгжүүлэх, хүн зоны ахуйн болон язгуурын онцлог давуу тал, нутгийн брэнд хөгжүүлэлтээрээ онцгойрох бүрэн боломжтой бүс нутаг. Та бүхний нутаг орноо хөгжүүлэх гэсэн зорилго, нутгийн өөрөө удирдах байгууллагын туршлагыг судлахаар ирсэнд талархаж байна” гэв.
