Швейцарын Холбооны Улсад зохион байгуулагддаг хоёр дахь том үзэсгэлэн “Валэгийн үзэсгэлэн яармаг” (Foire du Valais)-ийн “ХҮНДЭТ ЗОЧИН”-оор Монгол улс оролцож, монгол өв уламжлал, соёл урлаг, Монголын бараа бүтээгдэхүүнийг сурталчилж байна.
Үзэсгэлэн яармагт Соёл, спорт, аялал жуулчлал, залуучуудын яам, Жижиг, дунд үйлдвэрийн газар, Аялал жуулчлалын холбоо,
MISHEEL EXPO ХХК зэрэг төрийн болон төрийн бус байгууллагын дэмжлэгтэйгээр Монгол Улсын ноос ноолуур, арьс шир, гоо сайхны бүтээгдэхүүн үйлдвэрлэлийн 16 аж ахуйн нэгж, аялал жуулчлалын 6 компани нийт 40 орчим төлөөлөгч оролцож байна.
Үзэсгэлэн есдүгээр сарын 27-ноос энэ сарын 6-ныг дуустал үргэлжилнэ. Нийт 50,000 м2 хэмжээтэй томоохон талбайд, 400 гаруй компани, аж ахуйн нэгж оролцдог. Жил бүр 200-300 мянган хүн үзэж сонирхдог тус үзэсгэлэн яармаг 64 дэх жилдээ амжилттай зохион байгуулагдаж байна.
Үзэсгэлэнгийн үеэр Монгол Улсыг сурталчлан таниулах 6 ханатай Монгол гэрийг 10 хоногийн турш байрлуулж, монгол ёс заншил, соёлыг танилцуулах, монгол дуу хуур, бүжиг, шагайн харваа, бөхийн барилдааны үзүүлбэр зэрэг соёлын арга хэмжээг зохион байгуулж байна.
