Өмнөд Солонгосын ерөнхийлөгч Юн Сүк Ёл үндэсний онц байдал нүүрлэснийг мэдэгдлээ. Түүний дэвшүүлсэн асуудал бол улсын хэмжээнд төрөлтийн хувь багасаж хүн ам зүйн хямрал юм. Тиймээс төрөлтийн түвшинг нэмэгдүүлэх чиглэлээр бодлого, үйл ажиллагаа явуулж ажиллах шинэ яам байгуулахаар болжээ.
БНСУ дэлхийд хүн амын намлалтаараа тэргүүлэгч орны нэг ч төрөлтийн түвшин хамгийн багатай.
Ерөнхийлөгч Юн Сүк Ёл шинэ яам байгуулахад хамтарч ажиллах хүсэлтээ парламентдаа өгсөн бөгөөд шинэ яамыг нийгмийн асуудал эрхэлсэн дэд сайд удирдаж, боловсрол, хөдөлмөр эрхлэлт, халамжийн салбарын бодлогыг боловсруулж байдлаар ажиллах юм.
Тус улсад эмэгтэйчүүдийг хүүхэд төрүүлэхэд нийгмийн дэмжлэг үзүүлэхээр олон тэрбум ам.долларын төсөв зарцуулж байгаа ч дорвитой хувиар төрөлт нэмэгдээгүй.
Өмнөд Солонгосын төрөлтийн түвшин 2023 онд 0,72 болж, 2022 онтой харьцуулахад бараг найман хувиар буурсан байна. Энэ нь одоогийн 51 сая хүн амыг тогтвортой хадгалахад шаардагдах эмэгтэй хүнд ноогдох 2.1 хүүхдийн тооноос хамаагүй доогуур үзүүлэлт, энэ үзүүлэлтээр 2100 он гэхэд тус улсын хүн ам ойролцоогоор хоёр дахин буурна гэж шинжээчид үзэж байна.
Өмнөд Солонгост эмэгтэй хүнд ноогдох төрөлт 0.72 байгаа нь Эдийн Засгийн Хамтын Ажиллагаа Хөгжлийн Байгууллагын орнуудын дунд хамгийн бага, харин төрөх дундаж нас 33.6 байгаа нь энэ бүлгийн улсууд дотроо хамгийн өндөр үзүүлэлт юм. Тус улсын Засгийн газар шинээр хүүхэдтэй болж байгаа гэр бүлд бэлэн мөнгөний дэмжлэг олгох, хүүхэд асрах үйлчилгээ, үргүйдлийн эмчилгээнд дэмжлэг үзүүлэх ажлуудыг хийж байгаа аж.
