“Бие махбодь болон бэлгийн өөрчлөлт нь эрэгтэй эмэгтэй хүмүүст илрэх ялгаа нь ялгаруулж буй даавраас шалтгаалдаг. Хүний биед 43 булчирхай байдаг бөгөөд тэдгээр нь хүний биеийн бүхий л үйл ажиллагааг зохицуулж байдаг.
Нөхөн үржихүйн хамгийн чухал хоёр даавар нь эстроген (эмэгтэй) болон тестостерон (эрэгтэй).
Тэгвэл тестостерон гэж юу вэ?
Тестостерон даавар нь стероид бүтэцтэй эр бэлгийн гол даавар бөгөөд бөөрний дээд булчирхайнаас ялгардаг.
Эрэгтэйчүүдэд тестостерон нь шөнийн 2 цагаас өглөөний 6 цаг хүртэл хамгийн их ялгардаг бол үдээс хойш нэг цагт энэ дааврын ялгарал хамгийн бага байдаг. Энэ дааврын нөлөөгөөр эр хүн байгалиасаа ханхар цээж, булчин шөрмөс, хурц ухаанаас гадна үр удмаа үлдээх чадамжаар хангагдсан байдаг.
Гэтэл 30-аас дээш насны эрчүүд жил ирэх тутам тестостерон даавруудын нийлэгжил нь 1-2 хувь буурдаг тул гүзээ сууж, булчин сулбайж, бэлгийн сулралд ордог. Эдгээр эрсдэлд хүргэж буй гол шалтгааан нь эрчүүдийн амьдралын хэв маяг байдаг бөгөөд судалгаагаар машин, буйдан, шар айрагны нөлөө хамгийн их хувийг эзэлж байгаа аж.
Тестостерон хүний бие махбодод дараах үүргийг гүйцэтгэдэг.
- Булчин болон ясны массыг нэмэгдүүлэх
- Ясны нягтыг ихэсгэх
- Бэлгийн үйл ажиллагаа
- Сэтгэцийн эрүүл мэнд, танин мэдэх үйл ажиллагаа
- Зүрх судасны үйл ажиллагаа
- Бодисын солилцоо
Тестостерон нь спортод онцгой үүрэг гүйцэтгэдэг (уургийн нийлэгжилтийг хурдасгаж, кортизолын нийлэгжилтийг дарангуйлдаг). Тестостерон нь хүч чадал, булчингийн өсөлтөд нөлөөлж, бэлтгэл сургуулилтын дараа ядралтыг багасгах бөгөөд энэ нь бэлтгэлийн үр нөлөө, үр ашгийг эрс нэмэгдүүлдэг.
