Австрийн зураач Густав Климтийн сүүлийн 100 жилийн турш алдагдсан гэж үзсэн зургийг Вена хотод дуудлага худалдаагаар заржээ. Алдарт зураачийн дуусаагүй ажил болох “Фраулейн Лизерийн хөрөг” нь 30 сая еврогийн (26 сая фунт стерлинг; 32 сая доллар) үнэлэгдсэн байна. Уг зургийг 1917 онд буюу Климтийг нас барахаас нэг жилийн өмнө еврей аж үйлдвэрчдийн гэр бүл захиалж байжээ. Гэсэн хэдий ч уг зургийн талаар хариулт нь тодорхойгүй олон асуулт байдаг ба одоог хүртэл хөрөг дээрх эмэгтэй хэн болох мөн нацистын үед зурагт юу болсон талаар маргаан үргэлжилсээр байгаа аж.
Урлаг судлаачдын дийлэнхийн таамаглалаар уг хөрөг дээр эмэгтэйг еврей аж үйлдвэрчдийн чинээлэг гэр бүлийн ах дүү Адольф эсвэл Юстус Лизерийн охидын нэгийг дүрсэлсэн гэж үзэж байна. Харин урлагийн түүхч Тобиас Наттер, Альфред Вайдингер нар энэ зургийг Адольф Лизерийн охин Маргарете Констанс Лизерийнх гэж хэлжээ.
Харин урлагийн бүтээлийг дуудлага худалдаанд оруулсан Вена дахь Им Кинскийн дуудлага худалдааны ордныхон уг зурагт Юстус Лизер болон түүний эхнэр Хенриетт нарын хоёр охины нэгийг дүрсэлсэн байж магадгүй гэж үзэн танилцуулжээ.
