Санхүүгийн зохицуулах хорооны ээлжит хуралдаан боллоо. Хуралдаанаар Санхүүгийн зохицуулах хорооны 2020 оны нэгдүгээр сарын 29-ний өдрийн “Ногдол ашиг тараах ажиллагааг нарийвчлан тогтоох тухай” 28 дугаар тогтоолд өөрчлөлт оруулж, компаниудын ногдол ашиг тараах хугацааг нарийвчлан тогтоолоо. Тодруулбал, ногдол ашиг хуваарилахаар шийдвэрлэсэн компаниуд санхүүгийн жил дууссанаас хойш дөрвөн сарын дотор буюу дөрөвдүгээр сарын 30-ны өдрөөс өмнө ногдол ашгаа хуваарилж дуусган, тайлангаа Санхүүгийн зохицуулах хороонд ирүүлж байх үүрэг хүлээх юм. Ингэснээр хувьцаа эзэмшигчид ногдол ашгаа хугацаанд нь түргэн шуурхай авахын зэрэгцээ хөрөнгө оруулагчдын зах зээлд итгэх итгэл, идэвхийг нэмэгдүүлж, тэдгээрийн эрх ашгийг хамгаалахад ихээхэн ач холбогдолтой болж байна.
Түүнчлэн төрийн өмчит хуулийн этгээдийн хувьцааг нийтэд нээлттэй худалдах чиглэлийн дагуу “Монголын цахилгаан холбоо” ХК-ийн нэмж гаргаж буй үнэт цаасыг нийтэд санал болгохыг зөвшөөрсөн үнэт цаасны бүртгэлд бүртгэхээр шийдвэрлэлээ. Ингэснээр тус хувьцаат компани хувьцаагаа нийтэд санал болгон гаргаж буй төрийн өмчит хоёр дахь компани болж байна. Хуралдаанаар мөн нэг компанийн өрийг хувьцаагаар солих зорилгоор хаалттай хүрээнд нэмж гаргаж буй энгийн хувьцааг бүртгэж, нэг компанийн үнэт цаасны бүртгэлд өөрчлөлт оруулж, мөн хоёр компанийн хаалттай хүрээнд нэмж гаргаж буй энгийн хувьцаа болон нийтэд санал болгон гаргаж буй өрийн хэрэгслийг тус,тус бүртгэхээр шийдвэрлэв. Түүнчлэн даатгалын төлөөлөгчийн үйл ажиллагаа эрхлэх тусгай зөвшөөрлийг дөрвөн компанид, банк бус санхүүгийн гадаад валютын арилжаа эрхлэх тусгай зөвшөөрлийг гурван компанид нэмж олгохоор, барьцаалан зээлдүүлэх журмаар олгох мөнгөн зээлийн үйл ажиллагаа эрхлэх этгээдээр гурван компанийг, үнэт метал, үнэт чулууны эсхүл тэдгээрээр хийсэн эдлэлийн арилжаа эрхлэгчийн үйл ажиллагаа эрхлэх тусгай зөвшөөрлийг нэг иргэнд олгохоор шийдвэрлэлээ. Мөн нэг компанийн хувь нийлүүлсэн хөрөнгийн хэмжээ, хувьцаа эзэмшигчдийн бүтэц, бүрэлдэхүүнд өөрчлөлт оруулахыг зөвшөөрсний зэрэгцээ нэг компанийн үнэт цаасны зах зээлд андеррайтерийн үйл ажиллагаа эрхлэх, нэр бүхий гурван компанийн банк бус санхүүгийн үйл ажиллагаа эрхлэх тусгай зөвшөөрлийг сэргээхээр хуралдаанаар шийдвэрлэсэн юм.
