Монголын анхны сүлжээ ресторан болох “Номадс”-ын 20 жилийн ой энэ жил тохиож буй. Тэд салбартаа орчин, үйлчилгээ этгээд сонин хоолны нэрээр ялгарч зах зээлд жишиг тогтоон зочлох үйлчилгээний салбарт манлайлж буй үлгэр жишээ компаниудын нэг мөнөөс мөн.
“Нүүдэлчдийн соёлыг дэлхийд” уриатай Номадсынхан хийсэн бүтээснээ дүгнэж, хорин жилийн түүхийг бичилцсэн харилцагч, хамтран ажиллагч, байгууллага, хувь хүмүүсээ Crocus event hall-д хүндэтгэн урьж, чин сэтгэлийн талархал, халуун дулаан уур амьсгал дүүрэн онцгой нэгэн үдшийг хамтдаа тэмдэглэн өнгөрүүллээ.
Тэд “Уламжлалт монгол хоолны 99 жор” номоо зочдынхоо урилганы хамт хүргүүлсэн нь монголын уламжлалт хоолны жор технологийг хойч үедээ өвлүүлэн үлдээх зорилгынх нь нэг хэсэг байв.
Номадсынхан зочдоо өөрсдийн Slam Brau брэндийн алдарт шар айраг болон Дабл шот брэндийн амтат коктейлиор угтан авч, хүлээлгийн хэсэгт зочид монголын уламжлалт оньсон тоглоомууд, шагай наадгай, сээр цохих наадгайгаар хөгжилдөх боломжтой байсан нь зочдыг хөгжөөж, өв уламжлалаа сурталчилсан төдийгүй орчин үеийн казино тоглоом хүртэл байсан нь содон байлаа.
Номадсын хамт олон Монгол дахь Америкийн анхны франчайз ресторан Bds Mongolian barbeque ресторан, Олон улс үндэстний ресторануудыг хэрэглэгчдэдээ танилцуулж байсан үеэ бахархан дурсав.
Өдгөө Монгол хоолыг рестораны түвшинд хөгжүүлсэн Модерн номадс ресторан, Үндэсний тохиромжтой концепци бүхий кофе, коктейль лоунжийн сүлжээ Double Shotcoffee & cocktail, Залуусын дуртай Black Burger, орчин, тохижилт бүх зүйлээрээ шинэлэг Grill studio, хотын төвийн доргио паб Salm pub and bar, шинэхэн нээгдсэн Gradus lounge ресторанууд, монголын анхны multi-functional event hall Crocus event hall, Монголын анхны үндэсний сүлжээ зочид буудал Hotel nine, Австри технологийг Монголд нутагшуулсан Salm Brau зэргийг ажиллуулж, улсын эдийн засагт чухал нөлөөтэй томоохон төслүүдийн ажилчдын хоолны үйлчилгээ, Олон улсын хэмжээний томоохон conference, summit-уудын катеринг, үйлчилгээг харилцагч нарынхаа хамтын хүчээр амжилттай үзүүлснээ мөн онцлон тэмдэглэсэн юм.
Баярын арга хэмжээг нээж Номадсын сүлжээ рестораны үүсгэн байгуулагч М.Есөнмөнх хүрэлцэн ирсэн зочид, харилцагчдадаа талархлаа илэрхийлж үдшийн зоогт урьснаар нэгэн зэрэг хөшиг нээгдэж, номадсын хөгжүүлж буй найман төрлийн рестораны амтат хоол, үйлчилгээг зочид, төлөөлөгчдөдөө үзүүлэхэд бэлэн болсон байсан нь энэ үдшийн хамгийн оргил хэсэг байсан юм. Нүд гялбам амтат хоолнууд, яг л тэр ресторанд очсон мэт мэдрэмж төрүүлэхүйц орчин, тохижилт өнгө төрхийг шингээж бэлтгэсэн хэсгүүд хэн бүхний сонирхол, бахдалыг төрүүлж буй нь илт.
Номадсын сүлжээ нь монгол улсын урлаг соёлыг дэлхийд таниулахад чухал хувь нэмрээ оруулдаг бөгөөд Херо энтертэймэнттэй хамтран “Тамгагүй төр” жүжгийг амжилттай олны хүртээл болгоод буй. Тус арга хэмжээнд Баатар найруулагч болон нийт 80 гаруй уран бүтээлчид хүрэлцэн ирж, тэдний баярыг хуваалцсан сонирхолтой зочдын нэг байв. Түүнчлэн энтэртаймэнт хөтөлбөрт гадны болон дотоодын шилдэг хамтлаг дуучид, бүжигчид хүрэлцэн ирж хамтдаа дуулж, бүжиглэн халуун дулаан уур амьсгал бүрдүүлсэн юм.
Номадсчууддаа, зочлох үйлчилгээний салбарт монгол үндэсний брэндийг хөгжүүлж, дэлхийд танигдсан компани байхын тулд тасралтгүй урагшилж, нүүдэлчдийн соёлыг дэлхийд таниулах их үйлсэд нь амжилт хүсье!
