Соёлын сайд Ч.Номин “Тикток” компанийн олон улсын бодлого, төлөвлөлтийн захирал Даниел Рютэй өнөөдөр /2023.09.25/ уулзсан байна.
“Тикток” аппликейшн нь дэлхий даяар 1.6 тэрбум, идэвхтэй 1.1 тэрбум хэрэглэгчтэй олон нийтийн цахим сүлжээ. Тиймээс энэхүү цахим сүлжээгээр дамжуулан Монгол Улсыг олон улсад сурталчлах, хамтран ажиллах асуудлаар санал солилцсон байна.
Түүнчлэн “Тикток” цахим сүлжээнд Монголын контент бүтээгчдийг олон улсын зах зээлд танигдахад туслах, тус цахим сүлжээнд олон сая дагагчидтай контент бүтээгчдийг Монгол Улсад урьж, Монгол Улсын талаар контент бүтээх зэрэг асуудлаар ярилцжээ.
Мөн уулзалтаар “Тикток” компанийн олон улс дахь бодлого, төлөвлөлтийн захирал Даниел Рю БНСУ-ын Бусан хотноо болох олон улсын контент бүтээгчдийн форумд Монгол Улсын контент бүтээгчдийг оролцохыг урилаа.
