Сүүлийн жилүүдэд хөдөлмөрийн насны буюу ихийг хийж бүтээх боломжтой залуучууд Монгол улсын эдийн засаг, нийгмийн нөхцөл байдлаас үүдэлтэйгээр амьдралаа дээшлүүлэх зорилго өвөртлөн гадаад улс орныг зорих болсон. Эх орон, хайртай гэр бүлээ урт хугацаагаар орхин явах шийдвэр нь Монгол улсыг баялаг бүтээх боловсон хүчингүй болоход шууд нөлөөлсөн билээ.
Цаашлаад энэхүү нөхцөл байдал нь хүүхдийн эрх, боловсролын чанар, гэр бүлийн харилцаа, нийгмийн эрүүл мэнд зэрэгт сөргөөр нөлөөлж, өрхийн болон улсын хэмжээнд маш олон асуудал, бэрхшээлүүд үүсгэсээр байна.
Гэвч эдгээр асуудлууд зөвхөн манай улсынх бус, бидэн шиг хөгжиж буй улс орнуудын залууст адилхан тулгарч буй дэлхий нийтийн анхаарлын төвд байх ёстой сэдэв юм. Бүгд ярьдаг, мэддэг, шаналдаг, эмзэглэдэг хэрнээ бодит үйлдэл хийхгүй байна. Иймд нийгмийн томоохон төлөөлөл болсон залуус бид уг асуудалд ЦЭГ тавьж, бодит үйлдэл хийж, “ҮЛДЛЭЭ“ нийгмийн нөлөөллийн аяныг Монгол орон даяар эхлүүллээ.
Аяны санаачлагч “Зөвийг Шүгэлдэгчид” НҮТББ-ын залуус бидний 95 хувь нь гадаад улсад сурч, ажиллаж амьдарсан бөгөөд бид эх орондоо амьдарч, эх орондоо баялаг бүтээж ҮЛДЭХЭЭР шийдсэн залуусын төлөөлөл.
Аливаа улсын хамгийн үнэт БАЯЛАГ нь ИРГЭН байдаг.
Мэдээж гадаад улсад, сурч боловсорч, ажил хөдөлмөр эрхэлж туршлага хуримтлуулж болно, харин Эх орондоо эргэн ирдэг, болохгүй, бүтэхгүй гэж буцах биш ҮЛДдэг байгаасай.
Залуусаа эх орноосоо явах 1000 шалтгаан хайх бус, Эх орондоо үлдэх Ганцхан шалтгаантай болцгооё.
Монголынхоо олон мянган залуус, тэдний гэр бүлийг эх орондоо үлдэх шалтгаан гол хүч болж байгаа, хайртай бүхэнтэйгээ хамт байх боломжийг олгож буй ажил олгогч компани, хувийн хэвшлүүд та бүхнийгээ бидний энэхүү төсөл, санал санаачлыг дэмжин хамтдаа шүгэл үлээж бидний эмхэлсэн нийгэмд үүсч буй асуудалд ХАМТДАА цэг тавьцгаая гэж уриалж байна.
#үлдлээ #зөвийгшүгэлдэгчид #нөлөөллийнаян
