Муур хөгшрөх үед хамгийн түгээмэл тохиолддог үхлийн шалтгаануудын нэг болох архаг бөөрний өвчнөөс сэргийлэхэд туслах тарилга дээр Японы судлаачид ажиллаж байна. Энэхүү туршилтын эмчилгээ нь AIM нэртэй уураг дээр суурилсан бөгөөд энэ нь бөөрөн дэх хорт хаягдлыг цэвэрлэхэд тусалдаг аж.
Судлаачид муурнууд энэ уургаа байгалийн жамаар хангалттай идэвхжүүлж чаддаггүйгээс болж хорт бодис хуримтлагдан, цаг хугацааны явцад бөөр гэмтдэг болохыг тогтоожээ. Хэрэв клиник туршилтууд амжилттай болбол энэ эмчилгээ зарим муурыг 30 нас хүртэл амьдруулах боломжтой гэж үзэж байна. Мөн 2027 оноос зах зээлд гарах магадлалтай гэнэ.
