Интерьерийн мэргэжилтнүүдийн хэлж буйгаар, өнгө нь зөвхөн гоо зүйн хэрэгсэл биш харин хүний сэтгэл зүй, амралт, тайвшралд хүчтэй нөлөө үзүүлдэг хүчин зүйл юм. Тиймээс унтлагын өрөөний өнгө сонголт таны нойрны чанарыг сайжруулж, эсвэл бүр эсрэгээрээ муутгаж ч мэднэ.
Интерьерийн дизайнерын хэлснээр, хамгийн түрүүнд “Би ямар уур амьсгал бүтээхийг хүсэж байна вэ?” гэдгээ бодох хэрэгтэй. Ихэнх хүмүүс тайвшрал, дулаан уур амьсгал хүсдэг тул хүйтэн, амьгүй өнгөнөөс зайлсхийх нь зүйтэй.
Хүйтэн туяатай саарал болон цайвар цагаан өнгө нь өрөөг эмнэлгийн мэт хиймэл, гунигтай болгож харагдуулдаг. Харин дулаан, элсэрхэг, цайвар шаргал гэх мэт өнгөнүүд илүү тайван, тухтай орчныг бүрдүүлдэг гэж мэргэжилтнүүд зөвлөжээ.
Мөн тод шар, хурц ягаан, гүн ногоон зэрэг өнгө нь өрөөнд эрч хүч нэмж болох ч, хэрвээ хананд зонхилбол тайвширч амрахад саад болдог. Ийм өнгийг зөвхөн жижиг зүйлст жишээлбэл: дэр, хөшиг, зураг зэрэгт ашиглах нь хамгийн зөв шийдэл юм.
Харин улаан өнгө ихэвчлэн хүсэл, сэтгэл хөдлөлтэй холбогддог ч бодит байдалд сэргээх нөлөөтэй, цусны эргэлт болон эрч хүчийг нэмэгдүүлдэг тул нойрыг алдагдуулдаг. Судалгаагаар улаан өнгө нь хоолны дуршлыг ч нэмэгдүүлдэг, тиймээс амралтад зориулагдсан өрөөнд тохиромжгүй гэж үздэг.
Мэргэжилтнүүд дараах өнгийг нойр сайжруулахад тустай гэж үздэг:
Зөөлөн цэнхэр: Ухаан санааг тайвшруулж, аюулгүй мэдрэмж төрүүлдэг.
Арьсны өнгө болон элсэрхэг аястай өнгө: Дулаан, тогтвортой уур амьсгал бүрдүүлдэг.
Лаванд, цайвар нил ягаан, оливын ногоон: Тэнцвэртэй, байгалийн уур амьсгал бий болгодог.
Цайвар ягаан болон усан яагаан өнгө: Унтлагын өрөөнд цайвар ягаан өнгө хэрэглэх нь орон зайг илүү зөөлөн, дулаан, романтик уур амьсгалтай болгодог.
Хэт тод, хүйтэн өнгө унтлагын өрөөнд анхаарал сарниулж, тархийг идэвхжүүлдэг бол зөөлөн, дулаан өнгө тайвшруулж, гүн амралт бэлэглэдэг. Тиймээс “гоё харагдах” бус “амрахад таатай мэдрэмж төрүүлэх” өнгийг сонгох нь хамгийн зөв шийдвэр юм.
