Намрын сэрүүн өдрүүд үргэлжилж хотын гудмаар хөл хөдөлгөөн ихтэй ч нэг л дүнсгэр. Тэр эрс тэрс хэр нь өөр өөр мэдрэмжүүд зөвхөн намрын улирлынх. Навчис өнгөө сольж салхинд хийсэх нь дурсамжийн жижигхэн хуудаснууд нисэн буух мэт. Бүгдээс алсалдаг цаг хугацааны эргүүлгээс дурсамж гогодоё гэхэд хамгийн түрүүнд хүүхэд нас сэтгэл зүрхнээс цовхчино. Учир нь хүн хамгийн аз жаргалтай үеийн дурсамжаа илүү тод санаж үлддэгийнх…
Намрын тэр нэг нэгэн нисэн буух дурсамжуудын хуудаснаас нэгийг сийрүүлбэл…
Намар хичээл эхэлж зунжин уулзалдаагүй ангийн найзуудтайгаа нэг анги танхимд бужигнана гэдэг хөөртэй, баясалтай. Хичээлийн хуваариа дөнгөж цээжилж эхлэхтэй зэрэгцэн намрын спартакиадын тов сонсогдоно. Хурд хүчээ сорин өрсөлдөнө гэхийн өмнө ангиараа, бүгдээрээ, олуулаа хөгжилтэй, дурсамжтай өдрийг өнгөрүүлнэ гэдэг бүр ч хөөртэй, баясалтай.
Өглөө эртлэн босож дулаан цүнх, пүүз, дулаан хувцас зэргээ зэхнэ. Өдөр идэх жаал жуулхан юмаа ч цүнхлэхээ мартахгүй. Аймгийн төвийн хүүхдүүд учир автобус, унаа хөс гэх зүйл үгүй. Алхана, найзуудтайгаа алхана. Сургууль руугаа, гэр рүүгээ үргэлж найзуудтайгаа алхана. Хөгжөөнтэй, хөөртэй яриа дэлгэж инээлдэн алхах нь хамгийн гоё, хамгийн тухтай. Энэ удаа ч гурван найз маань гэрийн гадаа ирчихсэн намайг яаравчлахыг хүлээн зогсоно. Бид дөрвүүлээ дахин нэг найзыгаа замаасаа тосон авч нийлээд сургуулийн зүг яаран алхана.
Хамгийн сүүлийн намрын спартакиад. Гарааны зурвас барианы туузтай, уухайн дуу хүүхдүүдийн цагаан хор шартай цангинана. Энэ лавтай хамгийн шударга өрсөлдөөн байх. Харсан хэн бүхний хацраас улаа бутарч, бээрсэн гараа халаасалчихсан зогсоно. Есдүгээр сарын сүүлийн долоо хоног шүү дээ. Гадаа жиндүүхэн ч өдрийн нар илчээрээ ээсэн нарлаг сайхан өдрүүдийн нэг. Үүнээс хойших спартакиадгүй намар бүр ангийнхнаа санадаг, сурагч насаа санадаг, хүүхэд насаа санадаг.
Өнөөдөр намрын спартакиаддаа явж буй хүүхдүүдийг хараад өөрийнхөө дурсамжийн спартикиадыг саналаа.
Намар одоог хайрлахад сургана. Өнгөрсөн бүхнийг дахин тэврэхэд тэмүүлнэ, хамгийн сайхан дурсамжаа гаргаж ирээд нандигнан хайрлана, өнгөөрөө сэтгэл баясгаж үнэнээрээ зүрх ёог хийлгэнэ. Тиймдээ ч намар бол гунигийн биш дурсамжийн улирал…