УИХ-ын гишүүн О.Батнайрамдал Монгол Улсын хөгжлийн ирээдүйг тодорхойлох хүчин зүйл нь томоохон төслүүдийн хэрэгжилт гэдгийг онцолж, төрийн тогтвортой байдал, баялгийн шударга хуваарилалт, үндэсний эрх ашгийн төлөө нэгдэх шаардлагын талаар байр сууриа илэрхийллээ.
Тэрбээр, өнөөдөр Монгол Улс уул уурхайгаас хэт хамааралтай байгааг дурдсан бөгөөд “Бидэнд байгалийн баялаг байгаа ч энэ нь төрийн өмчөөр дамжин ард түмэнд шударгаар хүртээмжтэй хуваарилагдах ёстой. Энэ бол хамгийн гол асуудал” хэмээв.
Түүний хэлснээр, Үндэсний баялгийн сангийн тухай олон жил ярьсан ч хэрэгжүүлэх шатанд хүрмэгц улс төрийн тогтворгүй байдал үүсч, Засгийн газрыг огцруулах асуудал сөхөгдөж ирдэг нь томоохон төслүүдийг гацаах шалтгаан болж байна.
“Монгол Улсын эрх ашиг бүхнээс дээгүүр байх ёстой. Үндэсний эрх ашгийн төлөө улс төрийн намууд хамтран ажиллах нь зүй ёсны хэрэг. Сүүлийн 20–30 жил гацсан хоёр ч том төслийг хамтарсан Засгийн газар хөдөлгөж чадсан. Гашуунсухайт–Ганц мод чиглэлийн хэдэн тэрбумын асуудлыг хөндсөн төмөр замын төсөл гэхэд 18 жил гацсан. Төслийн нээлт хийгдэж байхад Засгийн газар огцрох болчдог. Энэ бол төрийн тогтворгүй байдал ямар үнэтэйг харуулж байна” хэмээн тэр хэллээ.
Түүнчлэн ганц нэгэн хувийн эрх ашгийн төлөө төр өөрөө бөхийх нь буруу хэмээн онцолж, тогтворгүй байдлаас үүдэн томоохон төслүүд үргэлж “асуултын тэмдэг” дор үлдэж байгаад харамсаж байгаагаа илэрхийллээ.
