Олон шалтгаанаас үүдэж хамар битүүрдэг ч голлох хоёр шалтгаан бий. Хамар, хамрын дайвар хөндийн үрэвсэл, гэмтлээс үүдэж эсвэл харшлаас болж хамар битүүрдэг. Харин хүмүүсийн дунд гэмтлийн гаралтай хамар битүүрэх тохиолдол их байдаг. Энэ нь хамрын мөгөөрсөн хэсэг мурийснаас шалтгаалдаг бөгөөд энэ тохиолдолд мэс заслаар эмчлэх боломжтой. Түүнчлэн харшил үүсгэгч элементүүд хүний биед нөлөөлж харшлын гаралтай хамар битүүрэлт ихсэх шалтгаан болдог байна. Зарим тохиолдол гэртээ амьтан тэжээх, тасалгааны ургамал тарьж ургуулах нь харшлах шалтгаан болдог ч хүмүүс тэр бүр анзаардаггүй.
Хамар байнгын битүү байх нь амьсгалын үйл ажиллагааг доголдуулдаг байна. Үүнээс шалтгаалж хүн голчлон амаараа амьсгал авдаг болно. Голцуу амаараа амьсгалах нь ямар ч шүлтүүргүй нян бактериар амьсгалах эрсдэлийг үүсгэнэ. Улмаар хоолой өвдөх, үүдэн шүдний өвчлөл болон хоолойн ангины суурь болдог. Мөн агаар солилцоо алдагдсанаар тархин дахь хүчилтөрөгчийн хэмжээ буурч, тайван бус болох, амархан ядарч сульдах шинж тэмдэг илэрнэ. Хамрын самалдаг хөөж хавагнаснаар хамар битүүрэх бөгөөд үүнийг агшаахын тулд хамрын дусаалга хэрэглэх тохиолдол элбэг. Хамрын дусаалга хэрэглэснээр богино хугацаанд хамар доторх судсыг агшааж, амьсгалыг хэвийн хэмжээнд аваачдаг.
Хамрын цацлага байнга хэрэглэснээр “хамар” өөрийн үндсэн үүргээ гүйцэтгэж чадахаа больдог. Тодруулбал хамар агаарыг бүлээсгэн, чийгшүүлж хүлээн авах, түүнчлэн гадна орчин дахь нян бактерийг шүүх үүрэгтэй юм. Үүргээ гүйцэтгэж чадахаа болисноор хамар салст орчимд хуурайшиж, судас гэмтэж, шархлаа үүсэх эрсдэлтэй.
Олонхын дунд хамрын цацлагыг дур мэдэн хэрэглэх нь бий. Хамрын цацлага байнга хэрэглэхээс аль болох зайлсхийж, өглөө, оройдоо хамраа зориулалтын уусмал, далайн давсны уусмалаар угааж хэвших хэрэгтэй. Мөн хамрын цацлага хэрэглэдэг бол нэг төрлийн цацлага хэрэглэхээс татгалзаж, олон төрлийнхийг ээлжилж хэрэглэхийг чих, хамар хоолойн эмч нар зөвлөдөг.