УИХ-аас Даатгалын тухай хууль болон Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулиудад даатгагч нь холбогдох этгээдээс бусад этгээдэд баталгаа, батлан даалт гаргах, төрийн худалдан авах ажиллагаанд даатгагчийн баталгааг хүлээн авах боломжийг бүрдүүлсэн нэмэлт өөрчлөлтийг оруулж баталсан. Энэхүү нэмэлт өөрчлөлттэй холбоотойгоор Санхүүгийн зохицуулах хорооны ээлжит хуралдаанаар “Даатгагчийн баталгаа гаргах үйл ажиллагааны журам”-ыг хэлэлцэж, баталлаа.
Төрийн болон орон нутгийн өмчит байгууллагууд, хувийн хэвшил болон олон улсын төсөл хөтөлбөрүүдийн хувьд тендерийн үйл ажиллагаандаа даатгагчийн баталгааг ашиглах болсноор иргэд, аж ахуйн нэгжүүдэд учирч буй санхүүгийн хүндрэлийг илүү эдийн засгийн үр өгөөжтэй байдлаар шийдвэрлэх, санхүүгийн салбарт зөв өрсөлдөөнийг бий болгох, мөнгөн урсгалын эргэлтийг нэмэгдүүлэх, даатгалын салбарын эрэлт нийлүүлэлтийг өсгөж, хамрах хүрээ, хүртээмжийг нэмэгдүүлэх боломж бүрдэж байна. Даатгагчийн баталгаа гаргах үйл ажиллагаа болон баталгаанд тавигдах шаардлага, түүнд хяналт тавихтай холбогдон үүсэх харилцааг зохицуулсан дээрх журам батлагдсанаар даатгалын компаниуд баталгаа гаргах үйл ажиллагаа эрхлэх тохиолдолд санхүү, төлбөрийн чадвар, удирдлага, зохион байгуулалтын хувьд ямар шаардлага тавигдах, баталгааны дээд хязгаар буюу хэдий хэмжээний баталгааг гаргаж болох зэрэг асуудлыг тодорхой болгож өгсөн. Ингэснээр даатгалын компаниуд 70 орчим тэрбум төгрөгийн баталгааг гаргах боломжтой болсон бөгөөд Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд заасны дагуу гаргаж буй нийт баталгааны 30 орчим хувийг даатгагчийн баталгаагаар хангуулах боломжийг бүрдүүлэх юм. Түүнчлэн, Даатгалын тухай хуульд оруулсан нэмэлт өөрчлөлтийн дагуу даатгалын компаниуд нь орон сууцны ипотекийн зээлийн урьдчилгаа төлбөрийн тодорхой хувьд даатгагчийн баталгааг гаргах боломжтой боллоо. Ингэснээр иргэдэд учирч буй санхүүгийн хүндрэлийг шийдвэрлэх, иргэдийн ипотекийн зээлд хамрагдах боломжийг нэмэгдүүлэх мөн бусад салбарын үйл ажиллагаанд дэмжлэг болох зэрэг нийгэм, эдийн засагт эерэг нөлөө үзүүлэх ач холбогдолтой.