Улаанбаатар хот цасаар хучигдсан ням гарагийн өдөр зорин байж Тэнгис кино театр луу зүглэв. “Эх орондоо л очихсон” баримтат киног үзэх гэж тэр. Эхэндээ цар тахлын үеийг харуулсан бүтээл гэдгээс илүү ойлголт байгаагүй ч уйлуулж, сэтгэл хөдөлгөх нь ойлгомжтой гэсэн хүлээлттэй байв. Үнэнийг хэлэхэд кино эхлэхээс өмнө ямар аймшигтай хоёр жилийг нийтээрээ давж гарснаа ор тас мартсан байснаа нуух юун.
… Хүмүүс туулж өнгөрүүлсэн өдрүүдээ яриад эхэллээ. Нэг их хол биш л дээ. Хоёрхон жилийн өмнөхийг. Жинхнээсээ ийм үйл явдлууд болсон билүү гэж ухраан бодвоос бид бүгдээрээ тэдгээр бараан өдрүүдийг дайраад өнгөрчээ. Телевиз, олон нийтийн сүлжээгээр мэдээллээд, давалгаалаад өнгөрсөн бүхний ард санаанд багтамгүй их тэвчээр, хагацал, нулимс, хатуу шийдвэрүүд нуугдаж байсныг тухайн үедээ огтхон ч төсөөлөөгүй аж. Гэрээсээ гарч найзуудтайгаа уулзаж чадахгүйдээ багтарч суусан миний дэргэд амь торгоон залбирч суусан киноны эгэл “баатар” хөл хорионы хатуу цээрийг дэндүү ихээр мэдэрчээ. Уг баримтат кинонд арав орчим хүн гадаадад олон хоногоор гацсан болон арай гэж эх орныхоо хилийн дээсийг алхсны дараа тусгаарлалт гэх залхаан цээрлүүлэлтийн 21 хоногийг хэрхэн өнгөрүүлснээ давс хужиргүй одоо цагт авчирна. Тэдний хэн нь ч нөхцөл байдал тартагтаа тулж, дэлхий тэр чигтээ айдаст автана гэж төсөөлөөгүй биз. Эх орон нь хаалгаа тас хаачихсан. Магадгүй түгжчихсэн. Орохыг хүсэвч хүлээж авахгүй. Элдэв арга сүвэгчлэн гэртээ харих замыг хайсан ч элэг нэгт монголчууд нь элгэмсэг дотноор тосч урихгүй. Тэр болгоныг умартаад гэр бүлтэйгээ уулзахыг чин зүрхнээсээ хүсэвч УОК-ын шийдвэр хүний амьнаас үнэтэй байсан цөвүүн цагийг тус кино илхэн харуулна.
Хэд хэдэн удаа хоолой зангирч суулаа. Тэр хүмүүсийн мэдэрснийг өрөвдсөн юм биш л дээ. Бид нэгэндээ ийм хайргүй, нийгэм ийм харанхуй, олон нийт ийм мартамхай болчихсон юмуу гэх бодолд дарагдан, өөрийгөө танин танин зангирч үзсэн хэрэг. Киноны онцгой хэсэг бүрд байдлыг өөрөөр эргүүлэх шийдэл байсан гэх мессеж нь улам эмзэглүүлнэ. Гэсэн хэдий ч буруутныг хайж, хэн нэгнийг яллах зорилго энэ кинонд байхгүй. Гагцхүү өөрсдийгөө эргэн нэг харах цаг ирснийг шулуухан илэрхийлсэн бүтээл юм. Ерэн минутын хугацаа есөн минут шиг л өнгөрсөн. Бусдын зовлонг нимгэлж чадахгүй ч дурлаж сонсох дуртай нь хүний муу зан гэлтэй. Хараа салгалгүй үзэж, нулимсаа байн байн арчиж төгсгөлөө. Илүүг бичиж нуршихаас илүү уншигч таныг очоод үзээсэй хэмээнд хүсч байна. Эх орон бидний цээжинд, ээжээ гэдэг үгтэй хамт оршиж байдгийг тус бүтээл батлах шиг болов. Цаг гарган очиж сэтгэлийг толио арчаарай, нэгийг бодоорой.
“Эх орондоо ч очихсон” баримтат кино нь Соёлын гавьяат зүтгэлтэн, сэтгүүлч, найруулагч Г.Золжаргалын “Zoljargal and Son film” болон “Зөвийг шүгэлдэгчид” НҮТББ-ын хамтын бүтээл юм. Уг киноны гүйцэтгэх продюсероор Б.Ганзориг, найруулагч З.Батбилэг, туслах найруулагч, редактор М.Батцэрэн, зураглаач Э.Тэмүүжин, дууны найруулагч Г.Батмөнх зэрэг тэргүүтэй залуу уран бүтээлчид ажиллажээ.
Хүний амьдрал үүлсийн нүүдэлтэй адил
Хүн бүхэн Эх орондоо ирэх,очих эрхтэй
Гэвч …
Зовлонгоор шалгуур тавьсан тэр мөчөөс
Зүрхэнд гуниг, харуусал, гомдол бий болсон.
Үзвэрийн хуваарь
2022.11.05 – 13:00
2022.11.06 – 13:00
2022.11.07 – 20:00
Билетийг зөвхөн Тэнгис кино театрын кассаас худалдан авна уу. Тасалбар 9000 төгрөгийн үнэтэй.
