БНХАУ-ын гангийн экспорт оны эхний 4 сард 2016 оноос хойших дээд цэгт хүрлээ.
БНХАУ-ын эрэлтийн төлөв хөрөнгө оруулагчдын анхаарлын төвд орж, өндөр үнэтэй зэсийн худалдан авалт буураад байна. Үүнтэй зэрэгцэн тус улсын үл хөдлөх хөрөнгийн худалдан авалтыг дэмжих бодлогыг тойрсон өөдрөг хүлээлт буурч, зэсийн үнэ хоёр дахь өдрөө дараалан уналаа.
БНХАУ-ын томоохон хоёр хот орон сууцны худалдан авалтад тавьсан бүх хязгаарлалтаа цуцалж, дотоодын үл хөдлөх хөрөнгийн хөгжүүлэгчдийн хувьцааны ханш өссөн ч пүрэв гарагт зэсийн үнэ буурав. Тус улсын Гаалийн газрын мэдээллээр дөрөвдүгээр сард ам.доллароор хийсэн зэсийн экспортын хэмжээ өмнөх оны мөн үеэс 1.5 хувиар өссөн байна.
Энэ нь зэсийн хэрэглээгээр тэргүүлдэг БНХАУ-ын эдийн засагт эерэг нөлөө үзүүлжээ. Нөгөө талд зэсийн үнэ өндөр байгаа нь БНХАУ-д эрэлт буурахад түлхэц болж байгаа аж.
Үүнээс гадна БНХАУ-ын гангийн экспорт дөрөвдүгээр сард 9.22 сая тонн хүрснийг тус улсын Гаалийн газар мэдээллээ. Энэ нь гуравдугаар сарын түвшнээс доогуур үзүүлэлт хэдий ч оны эхний дөрвөн сард 35 сая тонн экспортолсон нь 2016 оноос хойших дээд хэмжээ болж байна.
БНХАУ-ын үйлдвэрлэлийн хүчин чадал хэт өндөр болж илүүдэл бүтээгдэхүүнээ гадаадын зах зээлд гаргаж байна гэсэн барууны орнуудын шүүмжлэлийг энэ нь улам нэмэгдүүлж магадгүй байна.
Гангийн үйлдвэрлэлээр дэлхийд тэргүүлэгч БНХАУ түүхэндээ гангийн үйлдвэрийнхээ илүүдэл хүчин чадлын асуудлыг шийдвэрлэж чадаагүй. Үл хөдлөх хөрөнгийн зах зээлийн хямрал дотоодын хэрэглээг хязгаарлаж байгаа тул гангийн нийлүүлэлт нэмэгдсэн нь дахин анхаарал татаж байна.
