Зүрх судасны тогтолцоонд нөлөөлж буй эрсдэлт хүчин зүйлийн эхэнд яах аргагүй тамхидалт орно. Гэхдээ тамхи бол өөрчилж болох эрсдэлт хүчин зүйл юм. Тамхинаас гарснаар зүрх судасны өвчнөөс урьдчилан сэргийлэх төдийгүй эмчилгээ болдог гэсэн үг. Тамхинаас гараад 1 жил болоход зүрх судасны өвчнөөр өвдөх эрсдэл 50 хувь буурч, 3-5 жилийн дараа тухайн хүний бие тамхи татдаггүй хүнийхтэй адил эрүүлждэг байна.
Тамхи татдаг хүмүүсийн цусан дах өөх тосны үзүүлэлтүүд татдаггүй хүмүүстэйгээ харьцуулахад их байдаг. Энэ нь цусанд байгаа сайн өөх тосны хэмжээг багасгаж, муу өөх тосны хэмжээг ихэсгэж байна гэсэн үг юм. Үүнээс улбаалан цус өтгөрөх, судас ны уян хатан чанар нь алдагдах , судас нарийсах, өөх тосны хэмжээ ихсэх нь зэрэг процесс явагддаг.
-Тамхи татсанаас 20 минутын дараа гэхэд л зүрхний цохилт эргээд хэвийн байдалдаа орж цусны эргэлт сайжирдаг.
-Тамхи таталгүй 12 цаг болоход л хүний бие илүүдэл угаараас өөрийгөө цэвэрлэн нүүрстөрөгчийн дутуу исэл хэвийн хэмжээнд очиж хүчилтөрөгчийн хэмжээ нэмэгддэг байна.
-Нэг өдөр л тамхи татахгүй байхад зүрхний шигдээс болох эрсдэл тодорхой хэмжээнд буурдаг. Тамхи нь хүний биеийн сайн холестериныг үгүй хийж зүрхний титэм судсыг өвчлүүлдэг ба цусыг өтгөрүүлж тархинд цус харвах эрсдэлийг нэмэгдүүлдэг. Тэгвэл тамхи таталгүй нэг л өдөр болоход дээрх бүх өвчний эрсдэл буурч зүрх эрүүлээр ажиллан дасгал хөдөлгөөн хийхэд хялбар болж эхэлнэ.
-Тамхинаас гарснаас гурван хоногийн дараа хүний биед агуулагдах никотины хэмжээ багасдаг. Энэ нь мэдээж сайн хэрэг боловч таны бие никотиноор дутагдан толгой өвдөх, сэтгэл санаа тавгүйрхэх, уур цухал төрөх зэрэг шинж тэмдгүүд илэрнэ. Энэхүү байдал хүнээсээ хамааран 2-4 долоон хоног үргэлжилдэг.
-Тамхи таталгүй нэг сар болоход л уушгины үйл ажиллагаа эрс сайжирдаг. Уушгины багтаамж тэлснээр ханиалгахаа больж хөдөлгөөн хийсний дараа амьсгаадах нь багасна. Ямар ч төрлийн спортоор хичээллэхэд та илүү эрч хүчтэй болсноо анзаарна.
-Тамхи нь артерийн болон хялгасан судасны нарийслийг үүсгэдэг. Тэгвэл таван жилийн дараагаас эдгээр судаснууд эргээд тэлж эхэлдэг байна. Ингэснээр цус шингэрч тархинд цус харвах эрсдэл буурах юм.