image

Эрэгтэй болон эмэгтэй хүүхдэд ямар ч үед хэлж болохгүй ЕСӨН ҮГ

Эцэг эхчүүд хүүхдэдээ эрдэм боловсрол олгохын зэрэгцээ хэрхэн, яаж зөв хүн болгон төлөвшүүлэх вэ гэдэгт ихээр анхаардаг. Хүүхдийн хөгжил, төлөвшилд нөлөөлөх олон хүчин зүйл шинэ тутам бий болсоор байгаа энэ үед тэдэнд хамгийн ойрын хүн болох эцэг эх, багш, сурган хүмүүжүүлэгчийн хувьд заавал залруулах ёстой хэвшмэл ойлголт, хэлэхгүй байхыг хичээх үгсийн талаар хүргэж байна.

1. Эрэгтэй хүүхэд уйлдаггүй юм ...

Хүнд хэцүү цагт сэтгэл санаагаа хэрхэн тайтгаруулахаа хөвгүүд мэдэхгүй болсоор байна. Магадгүй цаашид сэтгэл санаагаа тайвшруулахын тулд болохгүй аргуудыг ч сонгох эрсдэлтэй. Уйлж тайвширчхаад, юу болсныг хамтдаа ярилцъя гэх зэргээр сэтгэл санаагаа уудлах боломжийг олгож, багаас нь бусадтай нээлттэй ярилцаж сургаарай.           

2. Охин юм байж гэрээ цэвэрлэсэнгүй ...                     

Зөвхөн эмэгтэй хүн л гэр цэвэрлэх ёстой гэсэн санааг өөхшүүлж, охидыг гэрийн ажлаас хэт хамааралтай болгодог. Ингэснээр хүүхэд тань эрэгтэй, эмэгтэй хүмүүсийн ажил үүргийн талаар буруу ойлголтыг өвлөж авна. Харин та хүүхдээ багаас нь ажил, хөдөлмөрт сургахыг хүсвэл нас, биед нь тохирсон ажлыг хүү, охин гэлтгүй эн тэнцүү хийлгэж хэвшээрэй.

3. Охид хөвгүүдээс илүү хичээнгүй сайн сурдаг ...

Ингэж хэлснээр хөвгүүд хайнга анхааралгүй байх нь хэвийн зүйл гэж ойлгуулж байдаг. Хүүхэд бүрд сурч, хөгжих нөөц бололцоо байгаа тул аль нэг хүйст давуу байдал олгосон ийм хандлага бүү гаргаарай. Хичээлээ сайн хийсэн хүү, охиноо тухай бүрт нь урамшуулаарай.

4. Эмэгтэй хүүхэд байж өөртөө арчаатай байж ...

Эмэгтэй хүн л өөртөө анхаарах ёстой, харин эрчүүд ингэх нь буруу гэсэн хандлагыг төрүүлнэ. Ийм үгийг олон дахин сонссон хөвгүүд эрүүл мэнд, боловсрол, аюулгүй байдлаа үл анхаарч, ирээдүйд хэнэггүй зангаас үүдэлтэй олон эрсдэлтэй учирдаг. Эрэгтэй, эмэгтэй хүмүүст биологийн ялгаатай хэрэгцээ, анхаарал халамж хэрэгтэй байдгийг нас, сэтгэхүйн онцлогт нь тохируулан хэлж, хүн бүр өөртөө  арчаатай байх ёстойг багаас нь ойлгуулаарай.

5. Эрэгтэй хүүхэд байж охин шиг хов зөөлөө ...

Болохгүй, бүтэхгүй асуудлаа хэлсний төлөө ингэж зэмлүүлснээр асуудал гарвал хэнд, хэрхэн хандахаа мэдэхгүй болно. Асуудал нь шийдэгдэхгүй үлдэж, хүү тань харилцааны зөв чадварт суралцахгүй хоцорч байна. Та аливаа зөрчилтэй асуудалд хэрхэн хандах, бусадтай яаж зөв харилцах, хэн нэгнийг шүүмжлэхээсээ урьтаж өөртөө шүүмжлэлтэй байх зэрэг зан чанарыг хүүхдэдээ зааж сургаж болох юм.

6. Хөвгүүд сахилгагүй, эмх замбараагүй ...

Эрэгтэй хүүхэд бүр дүрсгүй, эмх замбараагүй байх албагүй. Ингэж хэлснээр хөвгүүдийн сахилгагүйтэл замбараагүй байдлыг хэвийн үзэгдэл мэтээр дэмжиж өөгшүүлдэг. Хүүхэд бүрд хүйснээс үл хамаарч дэггүйтэх үе гардаг. Эрэгтэй хүүхэд учраас л сахилгагүй, эмх замбараагүй байлаа гэхийн оронд дэггүйтсэн учир шалтгааныг нь олж, эмх цэгцтэй болоход туслаарай.

7. Охид хөөрхөн байхын тулд гадаад байдалдаа анхаарах хэрэгтэй ...

Охид л хөөрхөн байх ёстой мэт шаардлагыг тулгаж, хүүхдийг гадаад үзэмжээр нь ялгаварлан гадуурхах хандлагыг өдөөх аюултай. Хүүхэд бүр ээж, аавдаа хамгийн хөөрхөн. Хүн бүр өөр өөрийн царай зүс, бие, галбираараа онцгой. Иймд хүн бүрийн ялгаатай байдлыг ойлгож, хүндэтгэхийг сургаарай.

8. Хөвгүүд юу ч хийсэн амьдарна, заавал их сургуульд сурах хэрэггүй ...

Охиноо л дээд боловсролтой, эрдэм мэдлэгтэй болгох хэрэгтэй. Хүү бол хар бор, хүнд хүчир ч байсан хамаагүй ажил хийгээд амьдарна гэсэн ойлголтоор тэднийг сурч боловсрохоос хойш татдаг. Гэвч энэ нь таны хүүгийн ирээдүй, нийгмийн байр суурь ажил амьдралд алсдаа сөрөг нөлөөтэй учир хүү, охин гэхгүй сурах, хөгжихөд нь дэмжлэг үзүүлээрэй.

9. Охин юм байж хөвгүүдтэй нийлж машинаар тоглоод ...

Охин, хүү гэдэг нь тус тусдаа өөр хүмүүс гэсэн ойлголтыг төрүүлж, эрэгтэй хүний ажлыг эмэгтэй хүн, эмэгтэй хүний ажлыг эрэгтэй хүн хийдэггүй гэсэн хандлагыг дэвэргэнэ. Ингэснээр таны хүүхэд өөртөө байгаа авьяас, нөөц бололцоогоо бүрэн дүүрэн нээн илрүүлж чадахгүй. Эрэгтэй, эмэгтэй хүйснээс үл хамаарч хүн бүр өөрийн онцлогтой байдаг. Иймд хүүхэд бүр тоглоом, найз нөхөд, хүсэл сонирхлоо илэрхийлэх, сонголт хийх эрхтэй гэдгийг санаж, хүүхэд тань чухам ямар өвөрмөц сонирхол, хүсэл мөрөөдөлтэй гэдгийг таньж мэдэхийг хичээгээрэй.

М.Гэрэлдэлгэр

0 Сэтгэгдэл:

Сэтгэгдэл илгээх