image

2MOOD | Би ихрийгээ хөгшрөөд эмээ болсон ч миний дараа л бурхны орон руу яваарай гэдэг, ихэргүй байна гэдэг төсөөлөгдөшгүй

Ихрүүдийн хэлэх үг, хийх үйлдэл нь хүртэл ихэнхдээ адилхан байдаг гэдгийг та нар мэдэх үү. Бид энэ удаа ихрүүдийн 2MOOD буландаа Б.Мөнхцэцэг, Б.Мөнхгэрэл гэх усны дусал шиг адилхан хоёр ихрийг онцлон танилцуулж байна. Тэдний асуултанд хариулж байгаа нь хүртэл адилхан хайр хүрмээр байсан гээч ... 

- Ихэр байх ямар байдаг вэ?

Б.Мөнхгэрэл: Гоё шдээ. Бүх юмс хосоороо. Үгээр хэлэмгүй сайхан зүйл бол ихэр хувь заяа минь билээ.

Б.Мөнхцэцэг: Мэдээж сайхан шүү дээ. Бүх зүйлс нь хоёроороо. Хэзээ ч уйдамгүй хөгжилтэй янз янзын гоё зүйлс их байна.

- Ихэр болж төрсөндөө баярладаг уу?

Б.Мөнхгэрэл: Маш их баярладаг. Ихэр заяаг олж төрнө гэдэг тийм ч амархан хэн бүхэнд тохиодог хувь тавилан биш гэж боддог. 

Б.Мөнхцэцэг: Баярлалгүй яахав. Хүмүүний орчлонд хоёр ихэр болж төрнө гэдэг бол ховорхон азтай хувь тохиол. 

-  Ихэрдээ хэлэх сэтгэлийн үг

Б.Мөнхгэрэл: Хорвоо дэлхийд ховорхон тохиох ихэр заяаг олж төрөөд миний ихэр байгаад баярлалаа. Чи бол миний толь юм шүү. Би өөрийгөө өөр талаас харах нэг өнцөг минь гэж боддог. Баярлах, гуниглах, жаргалтай, хэцүү бүхий л цаг үед дэргэд минь байдаг, урам зориг хүч чадлыг чамаас авдаг даа. Олон жил хамтдаа байж эмээ болтлоо хамт байна шүү . Надаас илүү урт наслаарай.

Б.Мөнхцэцэг: Үргэлж юу ч болсон миний дэргэд байж тусалдаг, дэмждэг, ойлгодогт баярладаг шүү. Юм бүхний эхэнд чи байдаг. Хааяа муухай аашилдагт минь уучлаарай. Ер нь өөрийгөө өөр талаас харъя гэвэл чамайг л хардаг даа.

No description available.

- Хэзээ ихэрдээ хамгийн ихээр баярлаж байсан бэ?

Б.Мөнхгэрэл:  Цэцэгээ их романтик. Хөөрхөн бэлэг дурсгал авч өгөх, энгийн үед ч гэнэт гадуур зугаалъя, гоё хоолонд орьё гэх мэт зөндөө зүйлсийг ярьж хэлж, хийж өгч баярлуулдаг. Хамгийн сүүлд санаж байгаагаар би их сургуулиа төгсөөгүй байсан юм. Корона гараад би хөдөө яваад бараг гурван сар бид хоёр хол байсан. Тэгээд хичээл орох болоод  өглөө  гэртээ орж иртэл “Welcome to Home” гээд ханан дээрээ бичээд, зүрхэн хэлбэртэй миний хамгийн дуртай өнгөтэй зөөлөн чихмэл бэлдчихсэн байж билээ. Тэр үед үнэхээр маш их баярлаж байсан, бас хэзээ ч мартдаггүй юм.  Үнэтэй гэхээс илүүтэйгээр сэтгэлээ гаргаж бэлдсэн зүйлд би их дуртай. Бусад хүмүүст ч мөн ялгаагүй тийм байдаг байх. Хожим хойно хүний  чин сэтгэлийн  зүйлс л бидэнд илүү тод үлддэг.

Б.Мөнхцэцэг:  Би ихэртээ өдөр бүр, хором бүрд баярладаг. Орой болгон миний хоолыг бэлдээд, хийчихсэн байдаг. Намайг эмчилдэг, халамжилдаг гуйсан бүхнийг минь зөвшөөрдөг. Ихэр минь их цайлган, сайхан сэтгэлтэй.

- Ихрийг чинь хэн нэгэн гомдоовол чих яах вэ, эсвэл яаж байсан бэ?

Б.Мөнхгэрэл: Цэцэгийн сэтгэл санаа тавгүй байх мэдээж надад таатай байдаггүй ээ. Хажууд нь хараад сууж байгаа хүнд ямар сайхан байхав дээ. Би бараг дагаад хямарчихдаг. Хэн нэгэн гомдоовол эхлээд шалтгаан учрыг нь гаргаж ярилц гэж зөвлөдөг.

Б.Мөнхцэцэг: Ер нь нээх их тэрэнд гомдсон, энэнд гомдсон гэж хэлдэггүй. Гэхдээ тэр үед тэрэнд жаахан тиймэрхүү санагдсан гэж хэлэх үе байдаг. Тухайн үед нь ярилцаад хэлж, ойлголцсон  нь дээр гэж зөвлөдөг. Намайг бодвол ер нь дөлгөөхөн хүн л дээ.

- Гоё гэж боддог, мэддэг таньдаг ихрүүдээ нэрлэвэл?

Б.Мөнхцэцэг: Туркийн олон ангит “Karasevda” киноны Zeynep-ийн дүрээр тоглодог жүжигчин ихэр. Тэр хоёр ихэр ёстой шилдэг санагддаг. Бас өөр нэг ихрүүд бол нэг нь МУИС-д, нөгөөх нь АШИУС-д сурдаг хоёр хөөрхөн охин байдаг юм. Нэрийг нь сайн мэддэгүй ээ. Анука хэн гэдэг билээ дээ. Би инстаграмаар л мэднэ. Гэхдээ танай 2Mood буланд оролцсон ихрүүдийг харсан ёстой бүгд хөөрхөн юм билээ.

Б.Мөнхгэрэл: Цэцгээтэй санал нэг байна. HumanZ- ийн 2Mood буланд оролцсон ихрүүдийг хараад л мэддэг болж байна.

- Ихэр та хоёроос хүмүүсийн хамгийн их асуудаг тэнэг асуулт юу вэ?

Б.Мөнхцэцэг: Хамгийн тэнэг асуулт бол та хоёрыг найз залуу чинь ялгахгүй байвал яах уу, нэг өдөр хамтдаа хуримаа хийх үү, чи ихрээ яг одоо юу хийж байгааг мэдэрч байна уу гэх мэт инээдтэй инээдтэй юм их асууна. Ихэр л болохоос ямар үзэж хардаг үзмэрч, лам биш яаж мэдхэв. Нэг эсийн ч гэсэн хоёр өөр бие хүмүүс шүү дээ.

Б.Мөнхгэрэл: Зөндөө шүү дээ. Найз залуучууд чинь андуурдаг уу, нэг нь өвдөхөөр дагаад өвддөг үү л гэнэ. Гадуур хамт явж байх үед заримдаа бүр араас дагаж ирээд та хоёр ихэр үү гэнэ. Нэгэнд нь хайр зарлавал андуураад байвал яахуу, ялгах тэмдэг тавьчихмаар юм биш үү гээд л сонин сонин юм их асууна шдээ. Сүүлдээ ч бүр чихэнд дасал болчихжээ.

- Ихэр чинь байхгүй гэж төсөөлдөө, ямар мэдрэмж төрж байна?

Б.Мөнхгэрэл: Төсөөлөхөд ч бэрх юмаа. Нүдэнд тортог ороод дутуу эсвэл харж чаддаггүй болчихдог шиг тийм л хэцүү байна байх. Нэг  үгээр бол хорвоо хоёр хуваагдсантай л адил гэхүү дээ. Би Цэцэгт хэлдэг юм хөгширсөн хойноо миний л дараа бурхны орон луу яваарай гэж.

Б.Мөнхцэцэг: Муухай штээ. Нэг том юм алга болчихсон ч юм шиг гунигтай байна байх. Ер нь олон хоногоор хамт байхгүй үед эхний хэдэн өдөр бол миний хувьд нэг тийм хоосроод байгаа юм шиг мэдрэмж төрдөг.  Манай Гэрлээ эмч учир зуны амралтаар дадлага гээд хөдөө гадаа явчихдаг байсан. Тэр үеүдэд их бодогдож санагалздаг байсан.

- Ихэртэйгээ хийж байсан хамгийн хөгжилтэй, сахилгагүй зүйл?

Б.Мөнхгэрэл: Бага байх үеэс гээд их л дурсамж  байна. Одоо хамгийн тод санагдаж байгаа нь зуны амралтаараа би мотоцикл унаж сурсан үе байлаа. Тэр зун бид хоёрт нэг хөөрхөн эрх ишиг байсан юм. Тэр ишигээ дундаа дүүрч явж байгаад гэнэт хонь дайрах гээд сандарсан даа болоод нүх рүү мотоциклтойгоо уначихсан. Тэгээд би мотоциклын халуун янданд хөлөө түлчхэж билээ. Нөгөөдөхөө аав ээжид хэлэхээс эмээгээд нуугаад сүүлдээ хөл маань болохоо байгаад араггүй эрхэнд хэлж байсан.

Б.Мөнхцэцэг: Ер нь би зүгээр сууж байгаад л чадчихдаг. Яаж ийж байгаад өдөөд чадчихдаг дэггүй гэх юм уу. Хүүхэд наснаас эхлээд зөндөө сайхан дурсамжууд байна. Аав маань та хоёр эмээгээ мөн ч их ийш тийш нь алхуулдаг байсан даа. Чихэр өгье гэхээр нь гүйж очиж чихрээ авчхаад бусад үед очдоггүй зугтаагаад чи тэрүүгээр гүй, би энүүгээр гүйе гээд баригддаггүй хүүхдүүд байсан. Эмээ чинь хөөрхий таягаараа та  хоёрыг  эргүүлээд л явдаг байсан гэж ярьдаг.

No description available.

- Ихэрдээ 0-10 хооронд хайраа илчил

Б.Мөнхгэрэл: 10 Би ихэрдээ өөрөөсөө ч илүү хайртай шдээ МЦ. Сүүлийн үед ихрийнхээ нэрийг ингэж товчилж дуудахаар гоё санагдаад байгаа.

Б.Мөнхцэцэг: Мэдээж 10-ийг өгнө. Сайхан зүйлс тохиолдвол дагаад баярладаг, сэтгэл нь таагүй байвал аль болох дэмжихийг хичээдэг. Ер нь тэгээд ямар ч үед бүхнийг хамтдаа хийдэг, шийддэг болохоор бүх зүйлд хамт байгаад сурчихжээ.

- Аав, ээж, ах дүү, гэр бүлээсээ ихэрдээ илүү хайртай байж чадах уу?

Б.Мөнхгэрэл: Гэр бүлдээ бүгдэд нь маш их хайртай. Хорвоо дээр төрүүлж өсгөсөн аав ээждээ хамгийн их хайртай. Дараа нь мэдээж ихэр.

Б.Мөнхцэцэг: Аль алинд нь хайртай. Гэхдээ хамгийн эхэнд гэр бүл. Түүний дараагаар Гэрлээдээ ч мөн хайртай байлгүй яахав .

- Ихэр чинь өвдвөл чамд ямар байдаг вэ?

 Б.Мөнхгэрэл: Мэдээж маш хэцүү. Хэн ч байсан хайртай гэр бүл нь өвдөж зовохыг харахыг хүсэхгүй. Тэр тусмаа ихэр нь өвдөх, өөрөө өвдсөн юм шиг л байдаг. Ихэр маань айхтар өвдөж байгаагүй, цаашдаа ч битгий өвдөөсэй. Бага зэрэг ханиад хүрэх, өвдөх зэрэгт аль болох өөрөө эмчлээд тус дэм болохыг хичээдэг.

Б.Мөнхцэцэг: Азаар айхтар өвдөж байсан үе байхгүй юм байна. Гэхдээ манай Гэрлээ эмч болохоор маш их зөвлөгөө өгч, халамжилна эмчилнэ.

Хааяа нэг Гэрлээг өвдөхөөр бас хоол цай барьж гүйнээ гүйнэ.

1- Та хоёрыг ялгах хялбар арга?

Б.Мөнхгэрэл: Хүмүүс хооронд нь бараг ялгадаггүй. Нэг л хүн яваад байна гэж боддог. Гэхдээ би Цэцэгийг бодвол арай өндөр туранхай. Бас царайны хувьд арай нарийхан.

Б.Мөнхцэцэг: Бид хоёр чинь маш адилхан. Хүмүүс маш их андуурдаг. Аав ээж маань хүртэл заримдаа андуурдаг. Яг тулаад харах юм бол өндөр, нам биеийн хэмжээс, дүр төрхийн хувьд өөр өөр байгаа.

- Хэн нь хамгийн ухаантай вэ, яагаад?

Б.Мөнхгэрэл: Би хувьдаа өөрийгөө гэж боддог. Гэхдээ манай Цэцэгээ ухаантай. Аливаа юманд нухацтай, гүнзгий ухаж ойлгодог.

Манай Гэрлээ ухаантай. Ер нь бол аливаа юманд буурь суурьтай, дөлгөөхөн тайван ханддаг. Бас маш нухацтай, хичээнгүй эмэгтэй.

- Ихрийнхээ өмнөөс ажил, хичээл, шалгалт, уулзалт, гэх мэт юманд явж байсан уу?

Б.Мөнхгэрэл:  Арван жилд бол хими, физик гэх мэт шалгалтыг нь өмнөөс нь өгөх тохиолдол хааяа байдаг байсан. Оюутан болоод тийм юм бол байгаагүй ээ. Учир нь бидний мэргэжил салбар өөр өөр учир шалгалт өгөх, хичээлд суух боломж байгаагүй.  

Б.Мөнхцэцэг: Арван жилд байхад байсан. Тэгээд өсөж том болохын хэрээр бидний ажил мэргэжил өөр өөр болж Гэрлээгээсээ урьтаж сургуулиа төгссөн учир тийм боломжууд гардаггүй байлаа. Гэхдээ заримдаа тоглоомоор ч бай, жинхэнээсээ ч бай чи миний тэрэнд очоод тэгээд өгөөч, ингээд өгөөч тэгэхүү гэх тохиолдлууд байдаг. Зав зай ажил төрлөөс шалтгаалаад амжихгүй байгаа.

- Аав ээж, найз залуу, найз охин нь ямар нэгэн байдлаар андуурч байсан уу, байсан бол яаж?

Б.Мөнхгэрэл: Аав ээж ялгахгүй байна гэж бараг байхгүй ээ. Хааяа утсаар ярихаар хоолойг нь ялгахгүй байх үе байдаг. Ах дүү, хамаатнууд одоо хүртэл ялгагддаггүй хэвээрээ байгаа.

Б.Мөнхцэцэг: Аав ээж, гэр бүл, найзууд андуурах нь гайгүй ээ. Ах дүү нар байнга андуурдаг. Багаас минь л андуурдаг байсан одоо ч ялгадаггүй юм. Багш нар маань хүртэл ялгадаггүй хэвээрээ. Ер нь бүгд ялгадаггүй.

- Хол хэдий ч нэгнийгээ мэдэрч байсан тохиолдол байгаа юу?

Б.Мөнхгэрэл: Байлгүй яахав. Хоёр жилийн өмнө Цэцэг хамт олонтойгоо Хөх хот, Ордос хотоор хэд хоног аялсан юм. Тэр үед хоол нь таарахгүй байгаа байх даа гэж боддог байсан. Учир нь бид хоёрын хоолны дуршил хүртэл ер нь адилхан халуун ногоотой хоол, элдэв үнэртэй зүйлд таатай бус байдаг. Тэгээд яг л миний бодож байснаар халуун ногооны харшилтай болоод ирсэн. Ихрүүд бид чинь нэгнийгээ хэнээс ч илүү маш сайн мэддэг.

Б.Мөнхцэцэг: Байгаа байгаа. Хааяа зүүд маань хүртэл адилхан байх тохиолдол байна. Би урьд шөнө тийм зүүд зүүдэлсэн гэж хэлэхээр тийм үү ямар сонин юм бэ, би бас тийм зүүд зүүдэлсэн шдээ гэдэг.

- Хэн нь хамгийн сахилгагүй хөдөлгөөнтэй нь вэ, яагаад?

Б.Мөнхгэрэл: Мэдээж Цэцэгээ хамгийн сахилгагүй нь. Мэдрэмжтэй сахилгагүй хэрнэ эгдүүтэй. Яаж ийж байгаад л намайг зүгээр байж байгаад л өдөх ч юм уу, чадчихаад байдаг юм.

Б.Мөнхцэцэг: Би үнэхээр сахилгагүй ээ, тэрийгээ шулуун шударга хэлчихье. Гэрлээгийн хажууд бол би маш сахилгагүй, хөдөлгөөнтэй. Бага байхаасаа л бүх юмыг нь дээрэмддэг, уйлж байгаад ч хамаагүй авчихдаг хүүхэд байсан гэсэн . Гэхдээ одоо тийм бишээ.

No description available.

- Хэн нь хамгийн хөөрхөн нь вэ, яагаад?

Б.Мөнхгэрэл: Маргаангүй би Цэцгийг гэдэг. Хөөрхөн инээмсэглэдэг, байгаа байдал нь энгийн хэрнэ аятайхан . Ихэр минь хамгийн хөөрхөн нь.

Б.Мөнхцэцэг: Гэрлээ намайг хөөрхөн гэдэг. Гэхдээ Гэрлээ ч бас хөөрхөн шүү.

- Ихэр хүүхэдтэй болохыг хүсдэг үү. Тийм бол яагаад, үгүй бол яагаад?

Б.Мөнхгэрэл: Хамгийн их хүсдэг. Ихэр хүүхэд цаанаасаа л хайр татам хөөрхөн байдаг шүү дээ. Хоёр хүн зэрэг өсгөнө гэдэг хамгийн их тэвчээр, хоёр дахин илүү их хариуцлага, анхаарал халамж шаардсан ажил юм шиг байдаг. Тийм ч учир ээжийнхээ авч байсан тэр сайхан мэдрэмжийг мэдрэхийг хүсдэг. Ер нь тэгээд ээж шигээ гайхалтай ээж болно гэж боддог.

Б.Мөнхцэцэг: Мэдээж хүснэ. Ихэр хүүхэдтэй байхын сайхныг ихрүүдийн гэр бүл, ихэр хүмүүс өөрсдөө, аав ээж нь л маш сайн мэднэ. Бүх зүйл нь хосоороо, нэгэндээ хэнээс ч илүү түшигтэй маш өхөөрдөм, маш нандин байдаг.

No description available.

 

 

 

 

1 Сэтгэгдэл:

  1. Ямар хөөрхөнүүд вэ. Би Мөнхцэцэг шиг юм байна. Миний ихэр Мөнхгэрэл шиг юм байна. Та хоёрт амжилт хүсье.

Сэтгэгдэл илгээх

Image 11
16

Фото | Ихэр мэт бие биетэйгээ ижил дотно найзууд ChaeLisa

Ихрүүд хоорондоо хамгийн сайн найзууд байдаг. Нэгнийхээ үнэнч найз, хамтрагч, зөвлөгч, туслах, гээд итгэл даах бүх зүйл нь. Харин яг л ихэр мэт ижилдэн дассан, яг нэг хүн мэт биедээ ууссан найзууд гэж байдаг. “Найз” гэдэг нь таны сонгож авсан гэр бүл гэсэн үг юм. Хүнд хэцүү болоод баяр жаргалтай үед хэзээд хажууд тань байдаг хүмүүсийг хэлдэг.

Цааш үзэх
Image 11
10

Ихрүүдийн сонирхолтой баримтууд l Цагаан идээ түлхүү хэрэглэдэг хүмүүс ихэрлэх магадлал өндөр

Ихэр төрдөг тавилан олон мянган жилийн турш хүн төрөлхтнийг гайхшруулсаар ирсэн. Ихэр хүүхэд яагаад төрдөг талаар мэддэг хүн цөөн. Тиймээс бид танд ихрүүдийн талаар зарим нэг сонирхолтой баримтуудаас хүргэж байна. Ихэр хүүхэд олноор мэндлэх нь тухайн газар орноос ихээхэн хамаардаг гэнэ. Хоорондоо усны дусал шиг адилхан ихрүүдийг нэг генийн ихрүүд гэдэг бол адилгүй ирүүдийг ах дүүс гэж нэрлэдэг. Түүнээс гадна Сиамын ихрүүд гэгддэг эд эрхтэнээрээ нийлсэн ихрүүдээс гадна долоон өөр хэлбэр байдаг байна.

Цааш үзэх
Image 11
06

Г.СҮРЭН | Ихрүүдийн ээж хорвоогийн бүх жаргалыг хоёр дахин үржүүлж мэдэрдэг

Эмэгтэй хүн нэг хүүхэд төрүүлэхэд л хэчнээн их өвдөж байж хоёр яс салдаг билээ дээ. Тийм байхад хоёр ихэр хүүхэд цагийн зайтай төрүүлнэ гэдэг бол, яг эхэнд авсан өвдөлтөө дахиад авна гэсэн үг шдээ. Маш их тамирдана, өвдөнө. Хоёр охин дээрээ их дотуур урагдал, язралтай төрж байсан. Хэдий тийм ч гэлээ цээжин дээр минь хүүхдүүдийг минь тавиад, хоёр талдаа амлуулахад би энэ хорвоогийн бүх жаргалыг хоёр дахин үржүүлж мэдэрсэн. Та нар төсөөлөөд үз дээ, хоёр талын хөхнөөс чинь яг адилхан хоёр нүд чамруу ширтээд, бяцхан гараараа энгэрийг чинь зуураад би тэр мэдрэмж, дүр зургийг одоо ч сэтгэлдээ хадгалж, яг тэр хэвээр нь зураглаж боддог. Хоёр хүүхэд зэрэг өсгөнө гэдэг бол асар их ядардаг.

Цааш үзэх
Image 11
04

2MOOD | Сайн уу БИД БОЛ УРАН НУГАРААЧ ИХРҮҮД

Ихэр болж төрөх, тэр дундаа усны дусал шиг ижилхэн, нэг эсийн ихрүүд болж мэндэлнэ гэдэг хорвоод юутай ч харьцуулшгүй их аз завшаан, баяр хөөр билээ. Зөрж өнгөрсөн хүмүүсийн гайхах төрх, өхөөрдөж өнгөрөх харц, сайхан дулаан үгс, зүгээр л ихэр байгаагаараа хүмүүсийн хайр хүндлэлийг хүлээнэ гэдэг ямархан их аз билээ дээ. Бид хоёр яг сайн харвал зарим зүйлс нь өөр шдээ гээд ярьж байгаа нь хүртэл адилхан хөөрхөн байсан шүү. Ихрүүдийн хайр бол нэг насны үнэнч хайр юм гэдэгтэй хэн ч маргахгүй буй за.

Цааш үзэх